Respublika ishchi guruhi a’zolari Mirzo Ulug‘bek tumanidagi ishlar jarayoni bilan tanishdi
Yurtboshimizning joriy yilning dastlabki kunlaridan “2025 yilda respublikamiz mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”qabul qilgan qarorida belgilangan vazifalar ichki ishlar organlari, jumladan, Toshkent shahar IIBB tomonidan chuqur o‘rganilib, ijrosi tizimli ravishda ta’minlanib kelinmoqda. Joylarda mazkur qaror ijrosi jarayonini o‘rganish, samaradorligini oshirish bo‘yicha tuzilgan Respublika ishchi guruhi poytaxt tumanlarida bo‘lib, IIO FMB hududiy tarkibiy tuzilmalari, “mahalla yettiligi”, mahalla faollari, tegishli tashkilot-idoralar mas’ullari tomonidan amalga oshirilayotgan ishlarni o‘rganib, hisobotlarini tinglab kelmoqda. Shunday tashriflardan biri poytaxtning Mirzo Ulug‘bek tumaniga uyushtirildi. Ishchi guruh a’zolari tumanda jinoyatchilikni barvaqt oldini olish, huquqbuzarliklarga qarshi keskin kurashish, jamoat tartibini saqlash, fuqarolar xavfsizligini ta’minlash, mahallalarda xavfsiz muhitni yaratish orqali jinoyatlardan holi hududga aylantirish, yoshlar, xotin-qizlar, muqaddam sudlanganlar va ishsizlar o‘rtasidagi jinoyatchilikning oldini olish maqsadida ularning bandligini ta’minlash, ijtimoiy-iqtisodiy muammolarini o‘rganib, bartaraf etish yuzasidan amalga oshirilayotgan ishlar bilan tanishib, mas’ullarning hisobotlari tinglandi. O‘rganishlar jarayonida aniqlangan kamchiliklarni bartaraf etish yuzasidan mutasaddilarga tegishli topshiriq va ko‘rsatmalar berildi. Shuningdek, aholi tinchlik-osoyishtaligini saqlash, jinoyatchilikka qarshi kurash, huquqbuzarliklarni barvaqt aniqlab, oldini olish, fuqarolarning murojaatlari bilan samarali ishlash, ayni vaqtda dolzarb bo‘lib kelayotgan kibermakondagi jinoyatlar, giyohvandlik vositalari, psixotrop va kuchli ta’sir qiluvchi vositalarning noqonuniy aylanmasi va tarqatilishiga qarshi kurashda, “Xavfsiz va sog‘lom yurt” oyligi doirasida tashabbus ko‘rsatib, faol profilaktik tadbirlar o‘tkazib, boshqalarga namuna bo‘lib kelayotgan ichki ishlar, Milliy gvardiya, mahalla faollari, yoshlar yetakchilari va boshqa mutasaddi idoralar xodimlari tuman hokimligining maxsus diplom va esdalik sovg‘alari bilan taqdirlandilar. Ishchi guruhining tumanlardagi vaziyat, jinoyatchilikka qarshi kurash, huquqbuzarliklarning barvaqt oldini olish borasida amalga oshirilayotgan ishlarni o‘rganish jarayonlari davom ettiriladi.
