Ma’lumki, joriy yilning yanvar oyida O‘zbekiston Respublikasi Prezidenti tomonidan 2025-yilda Respublikamiz mahallalarida xavfsiz muhitni yaratish va huquqbuzarliklarning oldini olishga qaratilgan qarori qabul qilingandi. Mazkur qaror bandlaridan kelib chiqqan holda, O‘zbekiston Respublikasi Ichki ishlar vazirligi hamda Respublika Oliy ta’lim va innovatsiyalar vazirligining 2025-yil 8 mart kuni qo‘shma qarori ishlab chiqilgan. Unga muvofiq oliy ta’lim muassasalari talabalarini har tomonlama qo‘llab-quvvatlash, talaba yoshlarni ma’naviy-axloqiy fazilatlariga salbiy ta’sir ko‘rsatishi mumkin bo‘lgan ommaviy madaniyat, yot va buzg‘unchi g‘oyalar ta’siridan asrash, ular o‘rtasida salbiy holatlar hamda huquqbuzarliklar sodir etilishining oldini olish, huquqbuzarliklar sodir etishga moyil shaxslarni barvaqt aniqlash kabi chora-tadbirlarni amalga oshirish belgilangan.

Kuni kecha shahrimizda joylashgan INXA universitetida bo‘lib o‘tgan uchrashuv ana shu mavzuga bag‘ishlandi. Uchrashuvda universitet mas’ullari, Toshkent shahar IIBB Migratsiya va fuqarolikni rasmiylashtirish boshqarmasi boshlig‘i, polkovnik Ulug‘bek Mirzakambarov, Universitet profilaktika inspektori va talabalar ishtirok etishdi. Uchrashuvda shuningdek talabalar migratsiya, ID kartalari, vaqtinchalik va doimiy ro‘yxatdan o‘tish, respublikamizga kirib-chiqish tartibi bo‘yicha ko‘plab savollariga javoblar olishdi.
Xuddi shu kabi ochiq va erkin muloqot tarzida tashkillashtirilgan uchrashuv Xalqaro Nordik universitetida ham bo‘lib o‘tdi. Tadbirda universitet ma’muriyati, Toshkent shahar IIBB JTSB boshlig‘i, podpolkovnik Baxodir Anvarov hamda profilaktika inspektorlari, talabalar ishtirok etishdi. Uchrashuvda talaba yoshlarni, bugungi kunda qiynayotgan ijtimoiy maishiy va boshqa muammolari shuningdek, poytaxt hududida sodir etilayotgan huquqbuzarliklar va jinoyatlar ayniqsa, yoshlar orasida keng tarqalayotgan giyohvandlik va psixotrop vositalari bilan bog‘liq holatlar va ushbu illatlarga qarshi kurashish chora-tadbirlari keng muhokama etildi. Muhokama so‘ngida talabalarning bu kabi salbiy holatlarga munosabati, jinoyatchilik va huquqbuzarliklarga qarshi kurashning samaradorligini oshirish borasidagi taklif va mulohazalari ham o‘rganildi. Savol-javoblar tarzida o‘tgan ochiq va erkin muloqot har ikki tomon uchun qiziqarli va foydali bo‘lgani ta’kidlandi.