Ijtimoiy tarmoq to‘ridagi talvasa
"Men 2023 yilning 30 sentyabrida ijtimoiy tarmoqlardagi “telegram” messenjirida kelgan xabarlar bilan tanishayotib, katta maosh taklif qilinayotgan ishga ko‘zim tushdi. “(...) bot” kanali orqali “admin” bilan bog‘lanib, u tomonidan yuborilgan geolokatsiya orqali Yuqorichirchiq tumaniga bordim. Ko‘rsatilgan joydan giyohvandlik moddasini olib, keyinchalik bo‘laklarga bo‘lib, mijozlarga “admin” yuborgan xabarlar asosida tegishli joylarga yetkazib bera boshladim...”. Bu ko‘rsatma 2005 yilda tug‘ilgan, o‘rta maʼlumotli, muqaddam sudlanmagan A.Nuriddinning tergov jarayonida bergan ko‘rsatmasidan parcha. Yana bildirishicha, qilayotgan ishi jinoyat ekanligini anglagach, u bu ishdan bosh tortadi. Ammo “admin” u haqidagi barcha maʼlumotlar: qayerda yashashi, oilasi kimlar, qayerlarda yurishi kabilar borligini aytadi. Agar bosh tortsa “sportik”larini (jazolovchi shaxslar nazarda tutilmoqda) jo‘natishini aytib, ishdan bosh tortgani uchun shafqatsiz, vahshiyona jazolangan shaxslar haqidagi videotasvirni jo‘natishadi. Bundan qo‘rqqan Nuriddin yana giyohvand va psixotrop moddalarini tarqatishga majbur bo‘ladi. Jazolanishdan qo‘rqib o‘zgalar hayotini zahri-zuqqumga aylantirayotgan Nuriddin 2023 yilning 2 oktyabrida Uchtepa tumani IIO FMB PPX xodimlari tomonidan qo‘lga olindi. O‘sha kuni Nuriddin tumandagi savdo majmuasi oldida mijozlari bilan uchrashib, “tovarni” topshirishi va pulini olishi kerak edi. Majmuada xizmat vazifalarini bajarayotgan formadagi xodimlarni ko‘rib, sarosimaga tushadi va o‘zini bejo tutib, ketayotgan yo‘lini keskin o‘zgartiradi. Bu holat xodimlarning eʼtiborini tortdi. Ular shaxdam qadamlar bilan unga yetib olib, xolislar ishtirokida tekshirishganida, qora rangli sumkasidan 1 dona elektron tarozi, uch dona polietilen paketga solingan quritilib, maydalangan, o‘tkir hidli moddalar aniqlanib, xolislar ishtirokida hujjatlashtiriladi.
Jinoyat ishlari bo‘yicha Uchtepa tuman sudi ochiq sud majlisida A.Nuriddinning jinoiy qilmishlarini qonunan ko‘rib chiqib, uni O‘zbekiston Respublikasi Jinoyat kodeksining 273-moddasining 5-qismi (“Giyohvand vositalari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish”) bilan aybli deb topdi va mazkur kodeksning 57-moddasini qo‘llab, 7 yilga ozodlikdan mahrum etish jazosini tayinladi.
Yuqoridagi jinoyat ishi tafsilotlarini Uchtepa tumani IIO FMB huzuridagi Tergov bo‘limi tergovchisi, kapitan Nurmuhammad Xo‘jayarov taqdim etdi.
