Ko‘ngli pokning - ishi pok
“Korrupsiya” so‘zi nega nafaqat bizning yurtimizda balki butun dunyoda juda ko‘p tilga olinadi? Chunki, u davlat qonunlarini chetlab o‘tish uchun turli yo‘llar bilan iskanjaga oladigan dahshatli illatdir. Shu bois butun jahonda unga qarshi kurash, murosasizlik hukmron. Bu illat shunchalar ildiz otgan-ki, har bir sohada, har bir makonda o‘z kirdikorini bot-bot eslatib turadi. Joriy yilning 5 martida Prezidentimizning Korrupsiyaga qarshi kurashish milliy kengashi yig‘ilishida uning islohotlarimiz yo‘lidagi eng katta to‘siq va g‘ov ekanligini taʼkidlagani ham bejizga emas. Ayniqsa, mansabdor shaxslarning o‘z mansab yoki xizmat mavqeidan shaxsiy manfaatlari yoxud o‘zga shaxslarning manfaatlarini ko‘zlab moddiy yoki nomoddiy foyda olishga intilishi tez-tez uchraydigan holatdir. Biroq barchani bir ipga tizib baho berish noto‘g‘ri.
Keling, shu kunlarda bo‘lgan daliliy holatlarga eʼtibor beramiz.
Maʼlumki, chegaralar ochilib, xalqimizning o‘z eʼtiqodi va diniy majburiyatlarini ado etishlari uchun keng imkoniyatlar darvozasi ochildi. “Haj”, “Umra” safarlari orzudan haqiqatga aylandi. Ammo bugungi kunda fuqarolarimizning bu ezgu niyatlaridan o‘z g‘arazli maqsadlarida foydalanishni rejalashtirgan nopok kimsalar ham yo‘q emas. Shundaylardan: masʼuliyati cheklangan jamiyatga qarashli sayyohlik firmalaridan birining norasmiy ishchilari: 2002 yilda tug‘ilgan J.T., 1985 yilda tug‘ilgan A.Sh., 1998 yilda tug‘ilgan A.N., 1979 yilda tug‘ilgan A.A.lar ofisda bo‘la turib, fuqaro G.B va uning 2 nafar tanishini ishchi vizasi orqali “Haj” ziyoratiga yuborish evaziga har biridan 7.000 AQSH dollari hamda G.B.ning onasini ziyoratga sayyohlik vizasi orqali yuborishga vaʼda berib 20.000 AQSH dollarini olayotgan vaqtida qo‘lga olindilar. Holat yuzasidan O‘zbekiston Respublikasi Jinoyat kodeksining 168-moddasi 4-qismi “a” bandi (“Firibgarlik”) bilan jinoyat ishi qo‘zg‘atildi. Tergovni yuritish poytaxt Mirobod tumani IIO FMB huzuridagi Tergov bo‘limi tergovchisi, kapitan Sanjar Raimovga topshirildi. Sanjar 2015 yildan ichki ishlar organlarida faoliyat yuritib kelmoqda.
Respublika IIV Akademiyasini muvaffaqiyatli tamomlagan, tergovchilik faoliyatini Mirobod tumani IIO FMB huzuridagi Tergov bo‘limida boshlagan Sanjar Raimov, poytaxtning Shayxontohur, Chilonzor tumanlari tergov bo‘limlarida ham faoliyat yuritib, tajriba va malakasini oshirib bordi. 2024 yilda esa ilk ish boshlagan Mirobod tumani IIO FMB huzuridagi Tergov bo‘limiga qaytdi.
O‘sha kuni jinoyat ishi bo‘yicha to‘plangan maʼlumotlarni va ashyoviy dalillarni ko‘zdan kechirib, tegishli hujjatlarni tayyorlab, allamahalgacha o‘tirgan tergovchiga fuqaro K.S. qabuliga izn so‘rayotganini maʼlum qilishdi. Qabuliga kelgan K.S. anchadan buyon gumonlanuvchi A.A.ni tanishi, uning “adashganligi”, aslida halol-pokligini maqtab, jinoiy javobgarlikka tortmasligi, hibsdan ozod qilishi evaziga 1000 AQSH dollari taklif qildi. Sanjar ushbu shaxsni pora olgangina emas, uni bergan shaxs uchun ham qattiq jazo belgilangani haqida bir necha marotaba ogohlantirishiga qaramay K.S. pul evaziga aynan A.A.ga yordam berishni so‘rab qo‘ymadi. Uning qarori qatʼiyligini anglagan Sanjar bu haqda tegishli soha vakillariga maʼlum qildi. Tezkor tadbir jarayonida, yaʼni 12 aprel kuni K.S. pullarni olib kelib, tergovchiga berayotgan paytida ashyoviy dalillar bilan qo‘lga olindi. K.S.ga nisbatan O‘zbekiston Respublikasi Jinoyat kodeksining 211-moddasi (“Pora berish”) bilan jinoyat ishi qo‘zg‘atildi. Endi u mansabdor shaxsga pora berganligi uchun qonun oldida javob bermoqda.
Tergovchi, kapitan S.Raimovning xizmat vazifalariga vijdonan yondashishi, halolligi, ichki ishlar xodimi shaʼnini yuqori tutishi, jinoyatchilarga murosasizligi ko‘p bora rahbariyatning eʼtiboriga tushgan. Rahbariyat tomonidan berilgan ko‘plab faxriy yorliqlar, tashakkurnomalar va boshqa mukofotlar bunga guvohlik beradi. Uning mazkur – o‘z vazifasiga halol munosabati, xodim degan nomga dog‘ tushirmaganligi, boylik vasvasasiga uchmaganligi holati ham eʼtiborsiz qolmadi. Rahbariyat tomonidan kapitan S.Raimovga tantanali ravishda pul mukofoti topshirilib, tashakkurnoma eʼlon qilindi.
