Nosirjon ikki farzandning otasi. Bir necha nevaralarning bobosi. Qo‘lida guldek hunari bor. O‘sha hunari tufayli oilasini boqib, tanish-bilishlar orasida hurmat qozonib kelayapti. Lekin yoshi ellikdan oshayotganida fe’li aynidi. Avvallari yashirincha spirtli ichimliklarni iste’mol qilib kelgan bo‘lsa, endi ochiqchasiga tez-tez ichishni odat qildi. Bot-bot mast-alast uyga kirib keladigan, salga janjal ko‘taradigan bo‘ldi. Bunisi ham mayli-ku-ya, ko‘chada ichib olib, o‘tgan-ketganning ham tinchini buzadigan, bo‘lar-bo‘lmasga hezlanishi hammasidan oshib tushdi. O‘sha 2023-yilning 3 oktabrida ham kechki soat 21larga yaqin yaxshigina kayfi bo‘lgan Nosirjon Yashnobod tumani “Aviasozlar” avtoshoxbekatida gandiraklab yurarkan yo‘lida duch kelgan O.Mirza va M.Mirkarimlarga g‘o‘ldiragancha nimalardir dedi. Yigitlar unga e’tibor bermay yo‘lida davom etisharkan, Nosirjon ularning ortidan so‘kingancha, birini kostumidan tortib, o‘ziga qaratishga urindi. Ammo yigitlar siltanib, "amaki, tinchgina uyingizga borib yotsangiz bo‘lmaydimi?”, deyishi bilan u battar yopisha ketdi.
– Busiz ham shohbekatdagi yo‘lovchilarga gap otib, turli be’mani qiliqlari bilan jamoat tartibini buzib , ochiqdan-ochiq hurmatsizlik ko‘rsatib, asabga tegayotgan Nosirjon, cho‘ntagidan pichoq chiqarib, yigitlarga zarba beradi, – deydi Yashnobod tumani IIO FMB huzuridagi Tergov bo‘limi tergovchisi, kapitan Bekzod Beknazarov. – Sud-tibbiy ekspertizasi M.Mirkarimga yetkazilgan tan jarohatini “og‘ir”, O.Mirzaga yetkazilgan tan jarohatini “sog‘lig‘ining qisqa muddatga buzilishiga olib kelgan yengil tan jarohati” deb tasdiqladi.
Jinoyat ishlari bo‘yicha Yashnobod tuman sudi ochiq sud majlisida 1975-yilda tug‘ilgan, muqaddam sudlanmagan A.Nosirjonning jinoiy qilmishini ko‘rib chiqib, uni O‘zbekiston Respublikasi Jinoyat kodeksining 104-moddasi 2-qismi “ye,l” bandi (“Qasddan badanga og‘ir shikast yetkazish”) bilan aybli deb topdi. Uning aybiga iqrorligi, pushaymonligi, oilaviy sharoiti, muqaddam sudlanmaganligi, yashash joyida ijobiy tavsiflanishi, jabrlanuvchilarning da’vosi yo‘qligini inobatga olib, Jinoyat kodeksining 57-moddasini qo‘llagan holda 2 yilu 6 oyga ozodlikdan mahrum qilish jazosini tayinladi.