Қарорни ўрганиш бўйича амалий ўқув машғулотлари
Маълумки, жорий йилнинг январь ойида Президентимиз томонидан “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида” ги қарори имзоланганди. Қарордан кўзланган мақсад – юртимизда тинчлик-осойишталикни, жамоат хавфсизлигини таъминлаш, жиноят, ҳуқуқбузарликлар содир этилишига йўл қўймаслик, қарорда белгиланганидек, барвақт олдини олишга қаратилган. Бу борада ички ишлар органлари, айниқса ҳуқуқбузарликлар профилактикаси, маҳалла еттилиги, фаоллари ҳамда тегишли идора ва ташкилотлар мутасаддиларининг якдиллик ва ҳамфикрлилиги, бир ёқадан бош чиқариб ишлашигина муваффақият келтириши табиий. Бунинг учун аввало, қарорда нималар кўда тутилган, қандай ўзгаришлар киритилган, уларнинг ижросини қандай таъминлаш лозим, қандай чора-тадбирлар ишлаб чиқилсагина у кутилган натижани беришини англаб олмоқ керак. Шу мақсадда пойтахтнинг Янгиҳаёт тумани 3-сектор раҳбари С.Жўраев томонидан тумандаги “Машъал”, “Олчазор”, Навқирон” маҳаллаларида мазкур қарорнинг мазмун-моҳияти, ижроси бўйича маҳаллалар еттилиги, фаоллари ҳамда ҳамкор корхона-ташкилотлар масъуллари иштирокида амалий-ўқув машғулотлари ўтказилди. Сектор раҳбари сўз бошида маҳаллаларда жиноятчилик, ҳуқуқбузарликларнинг олдини олиш борасида олиб борилаётган ишлар билан таништириб, қарорнинг бандларидан келиб чиққан ҳолда чора-тадбирлар белгилаш, ҳуқуқбузарликларга мойил шахсларни барвақт аниқлаш ва улар билан мунтазам равишда профилактик-тушунтириш ишларини олиб бориш, назорат ўрнатиш каби масалаларга эътиборни қаратди. Шунингдек, белгиланаётган чора-тадбирлар қуруқ қоғозда қолиб кетмаслиги, ҳар бир бандларнинг ижроси устидан қатъий назорат ўрнатилиши, аниқ жавобгар шахсларга юклатилиши таъкидланди. Шунингдек, маҳаллалар еттилиги, фаоллари ҳамда йиғилишнинг бошқа иштирокчиларининг бу борадаги таклиф ва мулоҳазалари тингланиб, амалиётга тадбиқ этиш учун эътиборга олинди.