Хотин-қизлар масаласи – муҳим масала
2002 йилда ИИВ Академиясини муваффақиятли тугатган Саҳоват Мелиева Яккасарой тумани ИИБда Хорижга чиқиш-келиш ва фуқароликни расмийлаштириш бўлими инспектори лавозимида иш бошлади. Ёш серғайрат, интилувчан лейтенантга бўлим катта инспектори, майор Гулнора Бозорова устозлик қилди. Соҳани тез ўзлаштирган Саҳоват кўп ўтмай Олмазор туман ИИБ ХЧКва ФР бўлимида, 2011 йилда эса туман ИИБ Ҳуқуқбузарликлар профилактикаси бўлими инспектори лавозимида фаолиятини давом эттирди. Унинг туман маҳаллалари раислари, фаоллари билан ишлаш, уларнинг бошларини бириктириб, ҳуқуқбузарликларнинг олдини олишга қаратилган тадбирларга жалб этиш, содир этилган ҳар бир жиноят ва ҳуқуқбузарликларни кенг жамоатчилик иштирокида муҳокама қилиш, тарғибот ишларининг самарали ташкиллаштиришдаги шижоати, саъй-ҳаракатлари раҳбариятнинг эътиборига тушди. 2019 йилда лавҳамиз қаҳрамони Саҳоват Мелиева туман ИИО ФМБ Ҳуқуқбузарликлар профилактикаси бўлими хотин-қизлар масалалари бўйича катта инспектори лавозимига ўтказилди. Шундан буён Саҳоват туманда жойлашган 64 та маҳалладаги оилаларда яшовчи хотин-қизларнинг “иссиқ-совуғидан” бохабар. Маҳалла фаоллари билан ишни тўғри ташкиллаштирганлиги боис, улар ёрдамида оила аъзолари томонидан турли тазйиқ ва зўравонликка дучор бўлаётган, аксарияти андиша ҳамда ор қилиб мурожаат қилишга ботинмайдиган аёллар ўз вақтида аниқланиб, маҳалла еттилиги, отинойилар, диний идора вакиллари ҳамкорлигида жойига чиқиб ўрганилиб уларга ҳуқуқий ҳамда ижтимоий-моддий ёрдам кўрсатилиб келинмоқда. Шу ўринда “Абубакр Шоший” маҳалла фаоли Мактуба Ризаева, “Шодиёна” маҳалласи фаоли Лолахон Мирсоатоваларнинг жонкуярлиги, ўз вазифаларига масъулиятини таъкидлаш лозим. Уларнинг ҳамкорликдаги саъй-ҳаракатлари туфайли, жорий йилнинг уч ойида турмуш ўртоғи, қайнонаси ва оила аъзолари томонидан, сурункали камситиб келинаётган, зўравонлик, турли тазйиқларга учраган қирқдан ортиқ хотин-қизларга ҳимоя ордерлари берилди. Бир неча ўн нафарига ижтимоий-моддий ёрдам кўрсатилди.– Одатда моддий қийинчиликлар, етишмовчилик, рўзғорнинг каму кўсти, бир ҳовлида бир неча оилалар –ака-ука, овсинларнинг яшаши ажрашишларнинг асосий сабаби, – дейди подполковник Сабоҳат Мелиева. – Куни кеча бир оиланинг ажримини муҳокама қилдик. Катта данғиллама ҳовли. Ёлғиз қайнона, ўзига ўзи хизмат қилади, қандли диабети бўлганлиги боис ош-овқатини ўзига ўзи тайёрлайди. Камига икки нафар уй хизматчиси бор. Эр-хотин олий маълумотли. Эр топармон-тутармон. Хотинига ҳам автомашина олиб берган. Бир қиз, бир ўғил фарзандлари бор. Бироқ хотини эрини хиёнатда айблаб, ажрашишга қарор қилган. Биз ҳар иккиси билан тушунтириш ишларини олиб бордик. Бироқ аёл “кўнглим қолган, ўртада меҳр йўқ, ажрашаман” деб туриб олди. Ачинарлиси, фарзанднинг бири “отам билан яшайман”, деса, иккинчиси “онам билан яшайман”, деб туриб олган. Айни пайтда аёли ота-онасиникида. Ҳайрон қоларли жойи – аёлнинг ота-онаси уйида катта қизи ҳам бир фарзанди билан ажраб келиб ўтирибди, энди иккинчи қизи ҳам ажрашмоқда, улар эса хайрихоҳ.Бу каби кўплаб воқеаларнинг шоҳиди бўлган подполковник Саҳоват Мелиева тарбия аввало ота-онадан бошланиши, фарзанд тарбиясида катталарнинг роли ўта муҳимлигини таъкидлайди. Бугунги кунда моддий бойликлар, ортиқча ҳашамат, дабдаба, “ким ўзарлик”ка берилиб, маънавиятимиз, қадриятларимизни менсимаслик каби ҳолатлар кўпайиб бораётгани сир эмас. Ёшларимиз, айниқса, хотин-қизларимиз томонидан “озодлик”, “эркинлик” тушунчасининг салбий, беўхшов талқини кенг ёйилаётгани ачинарли ҳолдир. Ҳар бир инсон бахтли бўлишга ҳақли. Ажрашаётган эр-хотинлар-ку ўз жуфтини, бахтини топиб кетар, аммо ўртада сарсон, бағри кемтик, меҳрдан мосуво, аросатда қолган болалар-чи?! Уларнинг ҳақ-ҳуқуқи кимнинг бўйнида?!
