Боғи шамол ва Янги шаҳар кўчалари чорраҳасидаги ЙТҲ

Бугун, 8-август куни соат 7:30 да 102 рақамига Юнусобод туманидаги Боғи шамол ва Янги шаҳар кўчалари чорраҳасида учта автомобиллар иштирокида йўл-транспорт ҳодисаси содир бўлганлиги ҳақида хабар келиб тушди. “Хундай” русумли автомобиль ҳайдовчиси 34 ёшли Шохруҳ Т. светофорнинг тақиқловчи сигналига ўтиб кетиб, 29 ёшли Ботир С. бошқарган “Кобальт” ва 24 ёшли Муроджон С. бошқариб борган “Спарк” автомобиллари билан тўқнашган. ЙТҲ натижасида қуйидаги фуқароларга тан шикастлари етган: “Кобальт” русумли автомобиль йўловчилари 40 ёшли Шукурулло А. ва 32 ёшли Маҳлиё К., шунингдек “Хундай” русумли автомобиль йўловчиси 10 ёшли И.Ш. ЙТҲдан жабрланганлар шифохонага етказилдилар. Аммо шифокорларнинг сайъ-ҳаракатларига қарамасдан, 10 ёшли И.Ш. ҳаётдан кўз юмди.

Ҳурматли ҳайдовчилар! Йўл ҳаракати қоидаларига сўзсиз риоя қилинг! Сизнинг йўллардаги хулқингиз нафақат ўзингизнинг, балки йўл ҳаракатининг бошқа иштирокчиларининг ҳаёти ва соғлиғига зиён етишига сабаб бўлиши мумкин.