ТОШКЕНТ ШАҲАР ИЧКИ ИШЛАР БОШ БОШҚАРМАСИ

Бир-бирини жарга етаклаганлар

2024 йилнинг 4 март куни Сардорхон “Ҳамид Олимжон” метро бекати ёнида бекорчиликдан айланиб юраркан, банкомат олдида турган М.Улуғбекнинг ёнига келиб, унга нақд пул кераклиги, ўрнига “Click”иловаси орқали пластик картасидан пул ташлаб беришига ишонтириб, 400.000 сўм пулни қўлга киритди-ю жабрдийданинг ҳай-ҳайлашига қарамай жуфтакни ростлади. У жиноий қилмишларини давом эттириб, энди шериклариниям жалб қилди. 10 март куни соат 21.00 ларда танишлари Жонибек, Жаҳонгир, Отабеклар билан тил бириктириб, Яшнобод тумани “Машинасозлар” маҳалласида “Treker” автомашинасида бекорчиликдан зерикишиб айланиб юраркан, кўчада ҳеч ким йўқлигидан фойдаланиб, ёлғиз кетаётган У.Сарварнинг йўлини тўсишди. Биргаликда машинадан тушиб, уни ўлдириш билан қўрқитиб, ёнида бўлган 2 500 000 сўм пулини талон-тарож қилишди. Қўлга киритган пулларни тўрт оғайни ўз кайф-сафосига сарфлашди. 24 март куни соат 17.30 ларда “Олмазор” метро бекати ёнида йиғилишган тўртовлон банкомат орқали пластик картасидан пул ечаётган Неъматжондан 300.000 сўм нақд пул бериб туришини, ўрнига пластик картасига пул ташлашни ваъда қилиб, унинг 300.000 сўм пулини олиб қочиб кетишади. ИИО ходимлари томонидан ушбу жиноий гуруҳ фаолиятига чек қўйилди, улар суднинг курсисида содир этган жиноятлари учун қонун олдида жавоб беришди. Жиноят ишлари бўйича Чилонзор туман суди очиқ суд мажлисида 1999 йилда туғилган Т.Сардорхон ва унинг тенгдоши муқаддам судланган Э.Жонибек, 1998 йилда туғилган муқаддам судланган Б.Жаҳонгир ва Ҳ.Отабекларнинг қилмишларини қонунан кўриб чиқди. Т.Сардорхон Ўзбекистон Республикаси Жиноят кодексининг 166-моддаси 3-қисми “а” банди (“Талончилик”) 168-моддаси 1-қисми (“Фирибгарлик”) билан айбли деб топилди ва 5 йилга озодликдан маҳрум қилиш жазоси тайинланди. Э.Жонибек Жиноят кодексининг 166-моддаси 2-қисми “а,в” бандлари (“Талончилик”) билан айбли деб топилиб, 3 йилга озодликдан маҳрум қилиш жазосига, Б.Жаҳонгир Жиноят кодексининг 166-моддаси 2-қисми “а,в” бандлари (“Талончилик”) билан айбли деб топилиб 3 йилга озодликни чеклаш, Ҳ.Отабек шу кодекснинг 166-моддаси 3-қисми “а” банди (“Талончилик”) билан айбли деб топилиб, 5 йил муддатга озодликдан маҳрум қилиш жазосига ҳукм қилинди. – Муқаддам судланмаган Т.Сардорхон юқоридаги фирибгарлик хатти-ҳаракатини содир этиб, муқаддам судланиб, қамалиб чиққан уч курсдошларининг ёнига бориб “қаҳрамонлиги” ҳақида мақтангани, бундан илҳомланган дўстлари даврасида яна бир талончиликка биргалашиб қўл уришганини кўриш мумкин, – дейди Чилонзор тумани ИИО ФМБ ҳузуридаги Тергов бўлими терговчиси, лейтенант Шаҳзод Турдиматов. – Ақл-ҳушини йиғиб олмаган гумроҳлар яхши, савоб ишлари, кимгадир кўрсатган беғараз ёрдами билан эмас, кимнидир қақшатгани, чув туширгани билан ҳаволаниши ақлга сиғмайди. Қилғиликни қилиб бўлиб, жазоланиши муқаррар бўлгач, қандай йўл билан бўлса-да озодликда қолиш илинжида айбни бир-бирига ағдаришини тасаввур қилинг-а! Шу ўринда ҳақли бир савол туғилиши табиий. Наҳотки, тўрт нафар куч-қувватга тўлган, ишлаб чарчамайдиган ёшда бўлган бу навқирон йигитларнинг ақалли бири “Ҳой тўхтанглар, нималар қиляпсиз?! Бунинг охири вой. Бу – жиноят!”, деб қайтармаган. Ҳолбуки, жиноят нима эканлигини улардан уч нафари жуда яхши билган. Ёмонга яқин юрсанг қораси юқар, деганлари бундан ортиқ бўлмаса керак. Хулоса чиқариш сизлардан.

25 Феврал 2025 йил

41

Қарор ижроси – амалда. Мирзо Улуғбек туманида амалга оширилаётган ишлар

Президентимиз томонидан жорий йилнинг январида юртимиз маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича қабул қилган қароридаги белгиланган чора-тадбирлар ижросини таъминлаш бўйича пойтахтимиз Ички ишлар бош бошқармаси тасарруфидаги барча ички ишлар органлари фаолиятини мувофиқлаштирувчи тизимларда қарорнинг мазмун-моҳиятини кенг жамоатчиликка етказиш, куч ва воситаларни жалб қилиш, тўғри ва манзилли тақсимлаш, ижро самарадорлигини ошириш бўйича ишлар жадаллаштириб юборилди. Пойтахтимизнинг Мирзо Улуғбек тумани ИИО ФМБ раҳбарияти куни кеча туманда жойлашган 64-сонли умумтаълим мактаби юқори синф ўқувчилари билан жиноятчилик ва ҳуқуқбузарликларнинг барвақт олдини олиш мавзусига бағишланган йиғилиш ўтказди. Бошқарма бошлиғининг маънавий ва маърифий ишлар бўйича ўринбосари, майор Дилшод Исмаилбеков, 3-сонли ИИБ бошлиғи майор А.Камбаровлар ўқувчиларга диний экстремизм, терроризм, гиёҳвандлик билан боғлиқ жиноятларнинг аянчли оқибатлари, интернет тармоқлари орқали тарқатилаётган маданиятимиз, қадриятларимизга ёт, бузғунчи ғояларга алданиб қолмаслик ҳақида ҳаётий мисоллар ёрдамида огоҳлантириш, тушунтиришлар беришди. Йиғилиш сўнгида ўқувчи ва маърузачилар ўртасида савол-жавоблар бўлиб ўтди. Туман ИИО ФМБ бошлиғи ўринбосари, подполковник Фарход Жабборов иштирокида туманда жойлашган Меҳнат ва ижтимоий муносабатлар академиясида таҳсил олаётган талабалар билан учрашуви ҳам ёшлар ўртасида қайд этилаётган жиноятчилик ва ҳуқуқбузарликлар таҳлилига қаратилди. Жумладан, рақамли технологияларнинг ҳаётимизга шиддат билан кириб келиши натижасида интернет тармоқларида бузғунчилик ва залолатга даъват қилувчи турли ҳавола ва гуруҳларнинг тўрига илинмаслик, гиёҳвандлик, уларни тарқатиш ёки граффити орқали мўмай пул топиш васвасасига тушмаслик, буларнинг охири жавобсиз қолмаслиги ҳақида ҳаётий мисоллар ёрдамида сўзлади. Шунингдек, кибержиноятлар, ижтимоий тармоқлар орқали содир этилаётган фирибгарликлардан огоҳ бўлиш, тенгдошларини ҳушёрликка чақириб, биргаликда бу ва бошқа жиноятларга қарши курашишга чақирди. Талабалар маърузачини диққат билан тинглаб, учрашув сўнгида ўзларини қизиқтирган кўплаб саволларига қониқарли жавоблар олишди. Бу каби профилактик тадбирлар пойтахтимизнинг барча туманларида давом этмоқда.

25 Феврал 2025 йил

54

Халқ соғлиғи – юрт бойлиги...

... деб бежизга айтилмаган. Соғлом халқгина соғлом келажакни яратишга қодир. Шу боис юртимиз аҳолисининг соғлиги давлат сиёсати даражасига кўтарилган бўлиб, соғлом турмуш тарзини кенг татбиқ этиш ва оммавий спортни ривожлантириш борасида Президентимиз ва Вазирлар Маҳкамаси томонидан қатор меъёрий ҳужжатлар қабул қилиниб, ижроси амалга ошириб келинмоқда. Юқоридаги меъёрий ҳужжатларда кўрсатилган бандларнинг талаблари Тошкент шаҳар ИИББ раҳбарияти томонидан ҳам мунтазам равишда ижро этиб келинади. Тошкент шаҳар ИИББ таркибий тузилма ва ҳудудий бўлинмалар, Миллий гвардия Тошкент шаҳар “Қўриқлаш” бошқармаси, Фавқулодда вазиятлар бошқармаси ходимлари ўртасида шу йилнинг 25 январидан 20 февралига қадар спортнинг волейбол ҳамда стол тенниси бўйича мусобақалар ўтказилди. 17 та жамоалар таркибида қатнашган 180 га яқин спортчилар ғолиблик учун беллашишди. Мусобақанинг дастлабки саралаш босқичлари Бош бошқарманинг Юнусобод туманида жойлашган спорт мажмуасида бўлиб ўтди. Муросасиз ва шиддатли кечган бу баҳсларда Миллий гвардия “Қўриқлаш” бошқармаси, Бош бошқарма марказий аппарати, ППХБ, ЙҲҲБ терма жамоалари барча рақибларидан устун келиб, финал ўйинларига йўлланмани қўлга киритишди. 20 февраль куни ИИВ “Жар” спорт мажмуасида ушбу мусобақаларнинг сўнгги тур ўйинларига старт берилиб, ғолиблар аниқланиб, уларни тантанали тақдирлаш маросими бўлиб ўтди. Ўйинларда маҳорат, абжирлик, чаққонлик кўрсатган жамоалар ҳакамлар ҳайъати томонидан юқори баҳоланди ва якуний ҳисобларга кўра: ярим финал баҳсларида Тошкент шаҳар ИИББ аппаратини 3:0 ҳисобда мағлуб этган Миллий гвардия “Қўриқлаш” бошқармаси терма жамоаси фахрли 3-ўринни эгаллади. 2-ўрин Тошкент шаҳар ИИББ ЙҲХБ терма жамоасига насиб этган бўлса, финал баҳсларда ИИББ ЙҲХБни 3:2 ҳисобида мағлуб этган Тошкент шаҳар ИИББ ППХБ жамоаси шоҳсупанинг 1-поғонасига кўтарилди. Ғолибларга Ўзбекистон Республикаси Волейбол федерацияси ва “Динамо” ЖТСЖ кенгаши томонидан тегишли диплом, медаллар ва қимматбаҳо совғалар топширилди. Шунингдек, мусобақада биринчиликни қўлга киритган Тошкент шаҳар ИИББ ППХБ жамоасига махсус кубок тақдим этилди. Шиддатли ва қизғин давом этган стол тенниси мусобақасида эса Миллий гвардия “Қўриқлаш” бошқармаси, шаҳар Фавқулодда вазиятлар бошқармасидан ташкил топган 16 та терма жамоалар таркибида жами 50 нафарга яқин спортчилар қатнашишди. Муросасиз кечган беллашувларда ҳар бир спортчининг хатти-ҳаракатлари ҳакамлар ҳайъати томонидан муносиб баҳоланиб борилди. Ўзаро куч синашиш натижасида сараланиб, мусобақанинг финал босқичига етиб келган энг кучли спортчилар кескин баҳсларда шиддатли, ҳал қилувчи жангга киришдилар ва қуйидаги натижаларни қайд этишди. Яккалик баҳслари бўйича 1-ўрин Миллий Гвардия “Қўриқлаш” бошқармаси инспектори, сафдор С.Мирзамахмутовга; 2-ўрин Сергели тумани ИИО ФМБ навбатчилик қисми катта инспектор навбатчиси, майор Ш.Ҳамроевга; 3-ўрин Тошкент шаҳар ФВБ ходими оддий аскар А.Илҳомовга насиб этди. Жуфтлик баҳсларида 1-ўринни Тошкент шаҳар ЙҲХБ (Д.Иноятов, Э.Отажонов) терма жамоаси; 2-ўринни Миллий гвардия “Қўриқлаш” бошқармаси (С.Мирзамахмутов, Ф.Абдуллаев) жамоаси; 3-ўринни Тошкент шаҳар ФВБ (А.Илҳомов, Э.Қурбонов) жамоаси эгаллади. Ғолиб ва совриндорлар муносиб тақдирландилар.

25 Феврал 2025 йил

57

Ёт ғояларга қарши биргаликда курашамиз

Ёшлар келажагимиз бунёдкорларидир. Уларнинг билими, баркамоллиги, маънавий-маърифий, руҳий-жисмоний соғломлиги, теран дунёқараши эртанги кунимизнинг тинчлиги ва фаровонлигининг кафолатидир. Бугунги глобаллашув, рақамли ахборот технологияларининг ҳаётимизга жадал кириб келаётганлиги ортидан бу имкониятлардан ғаразли мақсадларда фойдаланиб, қадриятлардан юз ўгириш, жамият қабул қилган меъёр ва қоидаларга тажовуз, ўзига ва атрофдагиларга зарар-зиён етказиш, ижтимоий ва маданий муҳитни бузишга қаратилган ўта салбий хавф-хатарларни ҳам келтириб чиқараётгани маълум. Интернет тармоқлари орқали миллат, давлат бирлигига таҳдид солувчи, инсон онгини заҳарлашга қаратилган турли контентларнинг гоҳ хуфиёна гоҳ ошкора бериб борилаётгани айни ҳақиқат. Бундан кўзланган мақсад: ҳали оқни-қорадан, яхшиликни ёмонликдан, фойдани зарардан ажратишга қодир бўлмаган ёшлардан фойдаланиш, ўз ғараз мақсадларига шерик қилиш. Ёшларни бузғунчи, миллатимиз, қадриятларимизга ёт бўлган ғоялардан асраш биз катталар учун ҳам фарз ҳам қарз. Шу мақсадларда пойтахтимиздаги олий ўқув юртлари талабалари иштирокида бузғунчи ғояларга қарши кураш, диний эсктремизм, терроризм, гиёҳванд моддаларининг ноқонуний савдоси, истеъмоли, тарқатилиши, наркотрафик, “наркограффити” билан боғлиқ жиноятлар, одам савдоси, кибержиноятлар, жиноятчилик, ҳуқуқбузарликларнинг ҳар қандай кўринишига қарши курашиш мавзуларида қатор учрашувлар, давра суҳбатлари, тренинглар, ўқув машғулотлари, профилактик-тушунтириш ишларини олиб бориш тадбирлари белгиланган. Куни кеча пойтахтимиздаги қатор университет ҳамда институтларда талаба ёшлар билан шундай профилактик тадбирлар бўлиб ўтди. Чунончи, Тошкент давлат стоматология институти раҳбарияти билан ҳамкорликда “Деструктив ғояларга қарши кураш” мавзусида давра суҳбати ўтказилди. Унда талаба ёшларга ёт, бузғунчи ғоялар таъсирига тушиб қолмаслик, кибермакондаги фирибгарлик ва гиёҳванд моддаларини тарқатиш, “наркограффити”га жалб қилишда қўлланилаётган турли найранг ва сохта ваъдаларга учиб қолмаслик борасида сўз кетди. Шунингдек, Ўзбекистон давлат хореография академиясида бўлиб ўтган шу каби тадбирда Тошкент шаҳар ИИББ Ҳуқуқбузарликлар профилактикаси бошқармаси, Академия раҳбарияти, ўқитувчи ва профессорлар ҳам қатнашди. Талаба-ёшлар ўртасида деструктив ғояларга қарши кураш ҳамда улар ўртасида терроризм ва экстремизм жиноятларининг олдини олиш ва унга қарши кураш, ҳуқуқбузарликлар содир этилишининг барвақт олдини олиш, “жаҳолатга қарши маърифат” билан курашиш, маънавий муҳит соғломлиги ва барқарорлигини таъминлаш мавзусида баҳс-мунозарали суҳбат бўлиб ўтди. Ислом Каримов номидаги Тошкент давлат техника университетида ташкиллаштирилган тарғибот тадбирида университет масъуллари, профилактика катта инспектори, капитан Б.Бобоқулов қатнашишди. Сўзга чиққанлар талаба-ёшларни интернет тармоғидаги терроризм ва эстремизмни тарғиб қилувчи контент ва ҳаволалардан эҳтиёт бўлишга, шубҳали таклиф ва даъватлардан ҳимояланишга, бундай ҳолатларга дуч келинганида қайси идораларга мурожаат қилиш ҳақида батафсил тушунтириш ва маълумотлар беришди. Худди шу каби давра суҳбати Геология фанлари университети талабалари билан ҳам ўтказилди. Унда профилактика инспектори, ҳуқуқ-тартибот органлари ва мутасадди идора вакиллари иштирок этди. Маърузачилар диний экстремизм хавфи, интернет тармоқларида тарқатилаётган даъват ва чақириқларга ишонмаслик, уларнинг аянчли оқибатлари ҳақида ҳаётий мисоллар ёрдамида маълумотлар бериш билан бирга бундай контентларга дуч келганда қандай йўл тутиш, ҳимояланиш чоралари ҳақида сўз юритдилар. Хусусан, шубҳали гуруҳ ва шахслар билан алоқага киришмаслик, диний ва бошқа ўзларини қизиқтирган саволларига расмий манбаалар ёрдамида жавоб топиш, ҳар қандай шубҳали ҳолатда ҳуқуқ-тартибот органлари билан ҳамкорлик қилиш зарурлиги таъкидланди. Шунингдек, маъмурий ва жиноий жавобгарлик тушунчалари, ёшлар орасида учрайдиган ҳуқуқбузарликлар ҳамда уларга қарши кураш масалаларига эътиборларини қаратишди. Ёшларни таҳдидлардан огоҳлантириш, ҳуқуқий саводхонликни ошириш ҳамда жиноятчиликнинг олдини олишга қаратилган чора-тадбирлр ҳақида сўз борди. Тошкент давлат иқтисодиёт университети талабалари билан ҳам худди шу мавзуни муҳокама ўтказилди. Хотин-қизлар масалалари бўйича инспекторлар томонидан талаба ёшлар ўртасида терроризм ва экстремизм жиноятларининг олдини олиш ва унга қарши кураш, ҳуқуқбузарликлар содир этилишининг барвақт олдини олиш, жаҳолатга қарши маърифат билан курашиш, маънавий муҳит соғломлиги ва барқарорлигини таъминлаш, ёт ғоялар таъсирида “одам савдоси” қурбони бўлиб қолишнинг олдини олиш бўйича огоҳликка чақирилди. Пойтахт олий ўқув юртларида ўтказилаётган бу каби огоҳлик тадбирлари ҳуқуқбузарликларнинг олдини олиш учун ҳар бир фуқаро, айниқса, ёшлар ўз ҳуқуқ ва мажбуриятларини тўлиқ билиши зарурлигини, қонун талабларига риоя қилиши, ноқонуний хатти-ҳаракатлардан тийилиши ҳамда тартиб-интизомга амал қилиши муҳимлигини тақозо этмоқда. Учрашувларда талабалар кўтарилган мавзулар бўйича ўз фикрларини билдириб, ўзларини қизиқтирган саволларига ваколатли масъуллардан батафсил жавоблар олиб, қониқиш ҳосил қилишмоқда. Бу эса уларнинг ҳуқуқий билимларини, маданиятини ошириш, қонунга ҳурмат ҳиссини шакллантириш баробарида ўзларини хавф-хатарлардан ҳимояланишига ёрдам беришини кўрсатмоқда.

25 Феврал 2025 йил

75

Интерактив хизматлар

Навбатчилик қисми

102

Ишонч телефони

1102

Туристлар учун

1173

Электрон манзил

info@iibb.uz

Text to speech

Sahifadagi xatolar bo`yicha manzil:

Matn xato bilan:

Sizning izoxingiz yoki to`g`ri versiya:

loading