Юртимизда ёз, айни саратон чилласи. Кунлар ҳаддан ташқари исиб кетди. Бундай иссиқда кўпчилик кондиционер тагида, кўчага чиққанлар эса ўзини сояга олишга уринади. Биз эса маҳалла осойишталиги ва хавфсизлигини таъминлаш йўлида кечаю кундуз хизматдамиз.

Шундай кунларнинг бирида маҳалла ҳудудини кўздан кечириб юргандим, бир киши югурганча келиб, қўшнисининг боласи уйида қулфланиб қолганини, унга ёрдам кераклигини билдирди. Тезда у киши айтган манзилга — Беруний кўчасидаги 2-уй 32-хонадонга етиб бордим. Борсам, хонадон эгаси Мавлуда Норбекова қулфланган эшик олдида йиғлаб ўтирар, ичкаридан эса боланинг чинқириб йиғлаётган овози эшитиларди. Дарҳол Тошкент шаҳар Фавқулодда вазиятлар бошқармасига қўнғироқ қилдим.

Лекин ҳеч бир инсон боланинг йиғлашига ва онаизорнинг “боламлаб” дод солишига чидаб тура олмайди. Мен ҳам ўйлаб ўтирмасдан, зудлик билан 5-қаватга чиқиб, қўшнининг деразаси орқали ичкаридан қулфланиб қолган уйга ўтиб, эшикни очдим. Уйига отилиб кирган онаизор фарзандини бағрига босди.

Она бу ҳолатда барча айб ўзида эканини, фарзандини ёлғиз қолдириб кетмаслигини қайта-қайта айтар экан, биз, профилактика инспекторларини бунчалик даражада ўз жонини гаровга қўйиб, одамларга ёрдам беради, деб ўйламаганини билдирди. Мавлуда опа кўзида ёш билан: “Энди билдимки, сиздай қўрқмас, жасур ва мард осойишталик посбонларимиз бизнинг ҳақиқий ҳимоячиларимиз экан. Сизлар бор экан, юртимиз тинч, осмонимиз мусаффо”, деди.

Қамалиб қолган бола эндигина бир ёшдан ошган. Она уни ёлғиз қолдириб, дўкондан ул-бул харид қилиш учун пастга тушган. Бироздан кейин қайтиб чиқса, эшик қулф бўлган. Ҳарчанд уринмасин, эшикни оча олмаган. Ичкарида болажон йиғлар, она эса жон ҳолатда ёрдам сўраб бақира бошлаган. Унинг овозини эшитган қўшниси мени кўриб қолиб, ёрдамга чақирган.

Шу ўринда айтиб ўтмоқчиманки, фарзандларингизни ҳеч қачон ёлғиз қолдирманг. Йўқса, юқоридаги каби вазиятга тушиб қолишингиз мумкин. Бу воқеа аянчли тугаши ҳам мумкин эди. Яхшиямки, ўз вақтида берилган хабар ва кўрсатилган ёрдам туфайли болажон эсон-омон ота-онасига топширилди.
Бу бир кунлик иш фаолиятимнинг ярим ёки бир соатлик воқеаси. Иш фаолиятимиз давомида бундан-да хавфли, аянчли воқеаларнинг олдини олиб, кўплаб ҳуқуқбузарликларни бартараф этамиз. Бизнинг фаолиятимизда тезкор ва ақлли қарор қабул қила олиш, ҳар қандай қийин вазиятни осонликча ҳал этишга хизмат қилади.

Бугун ҳуқуқбузарликлар оқибати билан эмас, балки унинг олдини олиш билан курашяпмиз. Бу борада “маҳалла еттилиги” билан тизимли ишлаяпмиз. Оила-турмуш муносабатлари доирасида олиб борилаётган ишларимиз натижасида бирорта нотинч, ажралиш ёқасида бўлган оилалар йўқ.
Маҳаллада 15 та кўп қаватли уй бўлиб, барча кириш йўлакларига “Бирор кўнгилсиз ҳолат ёки жиноят гувоҳи бўлсангиз, зудлик билан профилактика инспектори ва ИИБга хабар беринг”, деган огоҳлантириш қўлланмаларни жойлаштириб, телефон рақамларни ёзиб қўйганман. Беш минг нафар аҳоли истиқомат қилаётган ҳудудда битта умумтаълим мактаби ва мактабгача таълим ташкилоти, иккита тўйхона ҳамда мамлакатимиздаги энг йирик хусусий кўп тармоқли тиббиёт клиникаси жойлашган. Мана шундай таълим ва ижтимоий объектларга, кўчаларга, чорраҳаларга, жамоат жойлари ва барча савдо дўконларига тўққиз юздан ортиқ видеокузатув камералар қўйилган. Айримлари инсон юзидан ва автотранспортларни давлат рақамидан кимга тегишли эканини аниқловчи қурилма бўлиб, улар қидирувда бўлган шахс ва автотранспортларни топишда катта кўмак беряпти. Қувонарлиси, бугун одамлар ўзининг, маҳалласининг осойишталиги ва хавфсизлигини таъминлашни сўраб, биринчи навбатда бизга мурожаат қиляпти. Хизматларимизни эътироф этиб, миннатдорчилик билдиряпти. Бу эса бизни янада руҳлантириб, фаол ишлашга ундаяпти.

Алижон ЖУМАЕВ,
Олмазор туманидаги “Орзу” маҳалласи профилактика инспектори, катта лейтенант.

© Газета «Mahalla», №60 (2284), 2025 йил 26 июль