Юртбошимизнинг ташаббуслари билан аҳолининг мурожаатларининг жойида ўрганиш ва ижобий ҳал этиш мақсадида мунтазам равишда сайёр қабуллар ўтказиб келинмоқда. Бу жараён нафақат фуқароларнинг давлат органларига ишончини кучайтиради балки, тизим ривожланишига ижобий таъсир кўрсатади. Бугунги кунда давлат органлари фаолиятида аҳоли мурожаатларига ҳуқуқий, инсонпарварлик муносабатларининг намоён этилиши адолатли жамият қуришда асосий мезон сифатида қаралаётгани ҳам шундан. Шу муносабат билан жорий йилнинг 28 декабрь куни Республика ИИВ қошидаги «Жар» спорт-соғломлаштириш мажмуасида Ўзбекистон республикаси Ички ишлар вазирлиги масъул раҳбарлари иштирокида фуқаролар билан шахсий қабуллари ташкиллаштирилди. Қабуллар жараёнида пойтахт ИИББ бошлиғининг ҳам сайёр қабули бўлиб ўтди. Унда ИИББ фаолиятига доир йўналишлар бўйича фуқаролардан элликдан ортиқ мурожаатлар келиб тушди. Уларнинг аксарияти терговга қадар текширув, тергов ҳаракатлари, маъмурий ҳужжатлар, хизматга қабул қилиш ва қайта тиклаш билан боғлиқ, мол-мулк ва пул маблағларини ундириш, паспорт тизимига оид, йўл ҳаракати хавфсизлигини таъминлаш – светофор ва йўл белгиларини ўрнатиш, белгиланган маъмурий жарима бўйича норозилик, ички ишлар ходими хатти-ҳаракатига эътироз кабиларни ташкил этди. Мурожаатларнинг 28 таси ижобий ҳал этилди. Ўндан ортиғига ҳуқуқий тавсия, маслаҳатлар ҳамда уларни ҳал этиш бўйича йўл-йўриқлар кўрсатилди. Мурожаатларнинг 19 тасида келтирилган важларни қонун доирасида ўрганиш қўшимча муддат талаб қилганлиги боис ижро муддатлари ўрнатилиб, назоратга олинди ҳамда масъулларга тегишли топшириқ ва кўрсатмалар берилди. Ҳар бир мурожаатчи томонидан келтирилган маълумотларни ўрганиш чоғида уларнинг келиб чиқиш туб сабабларини аниқлашга эътибор қаратилиб, такрорий мурожаатлар тушишининг олдини олиш чоралари кўрилди. Шунингдек, қабулга ташриф буюрган уч нафар фуқаро муқаддам мурожаатлари ижобий ҳал этилганлиги бўйича ўз миннатдорлигини билдириш қаторида пойтахт ижтимоий ҳаётини яхшилашга боғлиқ таклифларини берди. Якунланиб бораётган 2025 йилда пойтахт аҳолисининг яшаш шарт-шароитларини яхшилаш, қонуний манфаатларини ҳимоялаш, конституциявий ҳақ-ҳуқуқларини таъминлашга қаратилган фуқаролар мурожаатларини тинглаш, ўрганиш, ечимини топишга қаратилган бу каби эзгу, инсонпарварлик, адолатпарварлик тамойилларини изчил амалга ошириш ишлари келгуси йилда ҳам тизимли равишда давом эттирилади.