2024 йилнинг 11 июни. Соат миллари кечки олтидан ошганига қарамай куннинг тафти ҳануз тушмаган. Ҳали ёз чилласи кирмаган-у, лекин иссиқдан одам ўзини қўйгани жой тополмайди. Меҳрангиз “Роҳат кўли” автобус бекатида бетиним елпиғичини елпиркан автобус йўлини пойларди. Ёнида ўралашаётган йигитга бир-икки бепарво қаради-да, ўз хаёллари билан банд бўлди. Кейинги сафар қараганида унинг тез-тез, деярли югуришдан берироқ бўлиб кетаётгани эътиборини тортди. Дарҳол сумкасини тита бошлади. Унинг югуриши бежизга эмас экан. Қизнинг сумкаси ичидаги нархи 3.324.000 сўмлик “Redmi Note 12” телефони ва 300.000 сўм пули бўлган пластик картаси ўғирланган эди. У вақтни бой бермай Бектемир тумани ИИО ФМБ га мурожаат қилди. Бекатга ўрнатилган видеокузатув камераси ёрдамида ўғри тез аниқланди. Ички ишлар ходимларига эшикни очган Х.Трофимнинг онаси воқеани эшитгач, қаттиқ изтиробга тушди. “Ўша куни укам йиқилиб, оёғини синдириб олганди. Онам касалхонама-касалхона югуриб, пулдан қийналиб қолди. Мен ёрдам бермоқчи эдим”, деб кўрсатма беради Трофим ўз қилмиши ҳақида. Унинг гапига ишонгинг келади-ю, лекин муқаддам икки маротаба ўғирлик учун судланганини билгач, ўзини онаси-ю укасига меҳрибон кўрсатишга уринаётгани ёлғон эканлиги, аслида нияти ўғирланган телефонни сотиб ўз эҳтиёжига ишлатиш бўлганлиги фош бўлади. Трофим онасига телефонни арзимаган нархга сотиб юборганини айтгани учун онаси фарзандининг гуноҳини енгиллатиш учун ўз ёнидан жабрланувчига худди шундай телефон олиб берди. Меҳрангиз Трофимга нисбатан ҳеч қандай даъвоси йўқлигини баён қилгани суд томонидан унинг қилмишини енгиллаштирувчи ҳолат сифатида баҳоланди.

Жиноят ишлари бўйича Бектемир туман суди очиқ суд мажлисида Х.Трофимни Ўзбекистон Республикаси Жиноят кодексининг 169-моддаси 3-қисми “а” банди (“Ўғирлик”) билан айбдор деб топди ва 5 йилга озодликдан маҳрум қилди.

Мазкур жиноят иши Бектемир тумани ИИО ФМБ ҳузуридаги Тергов бўлими терговчиси, лейтенант Муҳаммадризо Эшпўлатовнинг иш юритувидан олинди.