Ватанимиз мустақилликка эришганига кўп вақт бўлгани йўқ. Мустақиллик билан туғилган юртдошларимизга қараб, йилларнинг қанчалик тез ўтаётгани, шу билан бирга бу авлод мустақилликнинг барча неъматлари, имкониятларидан баҳраманд бўлиб вояга етаётгани, орзулари рўёбга чиқиб, эмин-эркинликда бахтли турмуш кечираётганини англаш қийинмас. Ички ишлар органлари, хусусан Тошкент шаҳар ИИББ таркибий тузилмалари ва ҳудудий бўлинмаларида ўз ҳаётларини ватан мустақиллигини ҳимоялаш, тинчлиги-осойишталигини асраш, жамоат тартибини сақлашга қалб амри билан бел боғлаган ўғил-қизлар кўпчиликни ташкил этади. Шулардан бири мустақиллигимиз тенгдоши: Бектемир тумани ИИО ФМБ 4-сонли ИИБ навбатчилик қисми катта инспектор-навбатчиси, капитан Мақсудхўжа Маҳмуджхўжаевдир. Мақсудхўжа оддий ишчи оиласида туғилиб вояга етди. Тошкент автомобиль йўллари коллежини тамомлаб Автомобиль ва йўллар институтида таҳсил олди. Институтни муваффақиятли тугатгач, 2020 йилда Бектемир тумани профилактика инспектори лавозимида илк фаолиятини бошлади.
– Коллеж, институтни битириб ўзим севган касбга – ички ишлар органларига ишга кирдим, – дейди лавҳамиз қаҳрамони. – Очиғи, нимаики ният қилган бўлсам, барчасига эришиб келмоқдаман. Иштиёқ, интилиш бўлса барча эшиклар очиқ. Энг асосийси, юртимиз тинч, осойишта. Бу ҳаммаси мустақиллигимиз шарофати билан албатта. Буни қадрига етишимиз, уни асраш учун курашишимиз керак. Айни дамда нафақалик гаштини сураётган, узоқ йиллар заводда ишчи бўлиб ишлаган отам Маҳмудхўжа, кутубхоначи бўлиб ишлаган онам Гулчеҳраларнинг дуоларида ҳам шу тилак.
Капитан М.Маҳмудхўжаевнинг оиласида тинчлик, тўқчилик. Турмуш ўртоғи Ферузахон билан икки нафар фарзандини эл-юрт корига ярайдиган, ўз Ватани тинчлиги ва равнақи учун фидокор инсонлар бўлиб вояга етишишлари йўлида тарбиялаб келишмоқда.