Пойтахтимизнинг Яшнобод туманида жойлашган “Банд бўлмаган аҳолига хизмат кўрсатиш мономаркази”да Тошкент шаҳар ИИББ раҳбариятининг шахсий сайёр қабули бўлиб ўтди. Бу каби қабулларда пойтахтимиз фуқароларининг ижтимоий-иқтисодий, маиший, айниқса, юридик масалаларига ечим топилиши юртимизда ҳуқуқий-фуқаролик жамиятини яратиш орқали аҳоли фаровонлигини юксалтиришга хизмат қилмоқда. Ушбу қабул Президентимиз томонидан “Маҳаллани ривожлантириш ва жамиятни юксалтириш йили” деб эълон қилинган 2026 йилда ўтказилаётган илк қабулидир. Мазкур тадбирда ташриф буюрган қирққа яқин фуқароларнинг мурожаатлари тингланди. Мурожаатларнинг ўнтаси қабулхонанинг ўзида ижобий ечимини топган бўлса, тўрттасига малакали ҳуқуқий йўл-йўриқлар берилди. Қолган фуқаролар мурожаатларида келтирилган важларни атрофлича текшириш ва ҳуқуқий баҳо бериш мақсадида ижро муддатлари белгиланиб, назоратга олинди. Мурожаатлар мазмун-моҳиятига кўра: маъмурий ҳуқуқбузарлик, суриштирув, тергов ҳаракатлари, мол-мулк ва моддий маблағларни ундириш, кадрлар масаласига оид, оила-турмуш доирасидаги келишмовчиликлар, пробация ҳисобидан ечиш кабиларни ташкил этди. Янги йилда бошланган хайрли тадбир пойтахтимиз маҳаллаларининг ривожланиши орқали жамиятни юксалтириш томон қўйилган қадамларнинг энг самаралиси ҳамда сермаҳсуллигидан далолатдир.