Салават Султонов Нукус давлат университетини муваффақиятли тамомлаб, коллежда ёшларга дарс бера бошлади. 5 йилдан кўпроқ ёшларнинг онги тафаккури шаклланиши, дунёқараши, билимларини мустаҳкамлаш, ватанпарварлик ва халқпарварлик руҳида тарбиялаш масалалари билан шуғулланди. Сўнг ўспиринлик орзуси ғолиб келиб, Республика ИИВ Академияси Сержантлар таркибини тайёрлаш олий курсларига ҳужжатларини топширди. 2020 йилда Қорақалпоғистон республикаси Тахтакўпир тумани ИИБда илк фаолиятини бошлаган Салават Султонов 2021 йилдан буён пойтахтнинг Миробод тумани ИИО ФМБ ҳуқуқий статистика бўлими катта инспектори лавозимида сидқидилдан хизмат қилиб келмоқда. Капитан Салават Султонов мустақиллик тенгдоши. Юртимизнинг илк мустақиллик одимларини биргаликда ташлаб унинг муваффақият ва ютуқларидан баҳраманд бўлиб, шаклланиш жараёнларидаги туғёнлар ва машаққатларни бирга енгиб келаётган шу замин фарзанди.Университетнинг тарих факультетида таҳсил олган Салават учун дунё халқлари, хусусан аждодларимизнинг мустақиллик, истиқлол, эркинликка бўлган кураш ва интилишлар тарихи яхши маълум.

– Мустақиллик аждодларимизнинг орзуси эди. Бу кунларга етганлар бор, етмаганлар бор. Ватанимизнинг кун сайин ўзгариб бораётган қиёфасини, дунё мамлакатлари ўртасида обрў ва нуфузининг ортаётганини кўриб фахрланиб кетасан, киши. Ўқиш, билим олиш, ўз имкониятларингни намоён қилиш, бахтли яшаш учун барча шарт-шароитлар яратилмоқда. Албатта, буларнинг қадрига етиш ҳамда уни асраш, келгуси авлодларга гўзал тарзда етказиш бизларнинг бурчимиз. Бу йўлда заррадек ҳисса қўша олсам ўзимни бахтиёр ҳисоблаган бўлардим, - дейди суҳбатдошимиз.