Санжар Ўзбекистон Республикаси Қуролли Кучларида йигитлик бурчини ўтаб қайтгач, ҳарбий фаолиятини давом эттириш мақсадида, ички ишлар органларига хизматга кириш ниятида Тошкент шаҳар ИИББга ҳужжатларини топширди. “Қўриқлаш” бошқармаси 2-алоҳида батальони сафдорлигидан иш бошлади. Иш бошлагунга қадар, бино ва иншоотларда хизмат олиб бораётган ходимларни кўрганида, ишлари оддий, жўн, кўп меҳнат ва диққат талаб қилмайдигандек кўринарди. Бироқ ўзи иш бошлаганда, масъулият ва жавобгарлик ҳиссининг нақадар залворли эканлиги, ҳар он, ҳар лаҳзада ҳушёрлик ва огоҳликни бой бермаслик зарурлигини англади. Бугунги кунда Тошкент шаҳар ИИББ Миграция ва фуқароликни расмийлаштириш бошқармаси бўлинмалари Манзил-маълумотлар бюроси оператори лавозимида ишлаб келаётган сафдор Санжар Каттабаев илк устози сержант Бахтиёр Якубовни ҳурмат билан тилга олади. Устозининг сабр-тоқат ва вазминлик билан хизмат сирларини ўргатгани, ҳужжатларни расмийлаштириш, ички тартиб-интизом низомларига амал қилиш кабиларни сингдиргани кейинги хизмат фаолиятларида жуда қўл келди. Бу вақт оралиғида Тошкент Ирригация ва қишлоқ хўжалигини механизациялаш Миллий тадқиқотлар университетини сиртдан тугатди. Айни пайтдаги лавозимига тайинланишдан аввал Манзил-маълумотлар бюросида ЭҲМ оператори, Миробод тумани ИИО ФМБ Миграция ва фуқароликни расмийлаштириш инспектори лавозимларида фаолият юритиб малака ва тажриба орттиргани боис, хизмат вазифаларини тез ўзлаштирди. Ҳар бир сўровнома ҳамда хизмат ёзишмаларига тезкорликда жавоб тайёрлаш, ҳуқуқий тўғри расмийлаштиришга катта эътибор билан қарайди. Санжар Каттабаевнинг келгусида режалари кўп. Ўз ҳаётини ички ишларга бағишлаган бу ходим юрт тинчлиги ва осойишталигини таъминлаш, ҳалол, сидқидилдан қилинган меҳнат қадр топиши, бахтли келажагига йўл очишига ишонади.