Тошкент шаҳар ИИББ шахсий таркиби билан ҳафтанинг ҳар душанба куни ўтказиб келинаётган “Маънавият ва маърифат дарси”да ёритилаётган мавзулар ходимларнинг дунёқарашини кенгайтириш, маънавий савиясини ошириш баробарида касб тайёргарлиги ҳамда хизмат фаолиятини самарали олиб боришда муҳим аҳамият касб этмоқда. Навбатдаги Маънавият ва маърифат дарси “Стрессни енгиш ва хизмат жараёнида руҳий барқарорлик” мавзусига бағишланди. ИИББ шахсий таркиби олдида  Республика ИИВ Академияси Хизмат психологияси ва касбий маданияти кафедраси бошлиғи ўринбосари, подполковник Ё.Парпиев маъруза қилиб, йиғилганлар эътиборини юртимизда олиб борилаётган кенг кўламли ислоҳотлар, мазкур ислоҳотларнинг устувор мақсади инсон омили, маънавий баркамоллиги эканлиги, янги давр ҳар бир инсондан ўз ички имкониятларини холис баҳолаш, психологик билимлар захирасини чуқурлаштириш  орқали  яқинлари ва ҳамкасбларининг руҳий дунёсини билиш ва ўрганишни  тақозо этишини таъкидлади. Шунингдек, ходимлар ҳар кунлик хизмат фаолиятида  психологик фаоллик, руҳий, ҳис-ҳаяжонли барқарорлик ва стрессга чидамлиликни сақлаб туришлари зарурлигини, айниқса ёш ходимлар бу жараёнда қийинчиликларга дуч келиши бундай ҳолатларда  жамоавий қўллаб-қувватлашнинг ўрни салмоқли эканлиги, яъни стресс ҳолатини 40-70 фоизгача камайтириши ва руҳий барқарорликни ошириши мумкинлигига эътиборни қаратди. Мавзу йиғилганларда катта қизиқиш уйғотди. Маърузадан сўнг йиғилганлар эътиборига “Таҳлилнома” ахборот дастури намойиш этилди.