Эътиқоди мустаҳкам одам ўзганинг хатосини кўрса тўғри йўл кўрсатишга ҳаракат қилади. Бу одамийликнинг юксак нишонасидан далолат. Асли нопок, қалби чиркин одам эса эгри йўлнинг ўртасига тушиб, етаклашиб жаҳаннам сари биргаликда қадам ташлайди. Пойтахтимиз туманларининг бирида масъулияти чекланган жамиятга қарашли ёнилғи қуйиш фаолияти билан шуғуллунувчи масъулияти чекланган жамият раҳбари лавозимида ишлаб келаётган Муҳаммаджон топар-тутаридан қониқмай, пулларни кўпайтириш мақсадида тадбиркорликни йўлга қўймоқни ният қилди. Бошида ёнилғи сотувидан тушган пуллардан 7-8 миллион олиб, улгуржи шакар харид қилиб, уни дўконларга ўтказиш орқали 5-6 миллион сўм фойда кўра бошлади. Пешона тери билан топилмаётган пуллардан ҳаволанган Муҳаммаджон онлайн қимор ўйинига ружу қўйди. Катта ўлжа илинжида бўлган Муҳаммаджонга катта пул керак бўла бошлади. У ёнилғи сотувидан тушаётган пулларни ҳар сафар ўйинда ютса ўрнига қўйиш фикрида ўзлаштира бошлади. Аммо негадир ҳар сафар омади чопмас, пуллар олинар лекин жойига қайтарилмас эди. Бу ўғирликларни шахобча оператори Адҳам сезиб қолди ва сурбетларча “доля” талаб қила бошлади, йўқса сирини ошкор қилишини айтиб, пўписа қилди. Муҳаммаджон унга онлайн қимор ўйинига адашиб кириб қолгани, ҳозир анча ҳадисини олиб “сирига” тушунаётгани, ҳадемай катта ютуқни қўлга киритиши, ўшанда ҳамма пулларни жойига қўйишини айтди. Адҳамга ўйин шартлари ва қоидаларини тушунтирганида, гарчи у Муҳаммаджондан беш ёш катта бўлишига қарамай, тўғри йўл кўрсатиш ўрнига у ҳам йирик бойлик васвасасига учиб, қизиқиб қолди ва бу онлайн-қиморга қўшилди. Шу-шу ҳар иккиси тортинмай ёнилғи сотувидан тушаётган пуллардан ўз чўнтагига қўл тиққандек олиб ўйинга тика бошлашди. “Ана ютаман, мана ютаман”, деб турганларида тўсатдан шаҳар солиқ хизмати томонидан шахобчада тафтиш ўтказилди. Текширувларда 2022 йил 5 сентябридан 2023 йил 31 майигача 2.323.054.900 сўм миқдордаги пул маблағлари талон-тарож қилинганлиги аниқланди.
Жиноят ишлари бўйича Миробод туман суди очиқ суд мажлисида 1999 йилда туғилган М.Муҳаммаджон ва 1995 йилда туғилган А.Адҳамнинг жиноий ишларини қонунан кўриб чиқиб, уларни Ўзбекистон Республикаси Жиноят кодексининг 167-моддаси 3-қисми “а” банди (“Ўзлаштириш ёки растрата йўли билан талон-тарож қилиш”) билан айбли деб топди. Суд ҳайъати жазо тайинлашди айбдорларнинг муқаддам судланмаганлиги, яшаш манзилларида ҳар иккисининг ижобий тавсифланиши, чин дилдан пушаймонлигини эътиборга олишди. Уларга нисбатан Жиноят кодексининг 45-моддасини (“Муайян ҳуқуқдан маҳрум қилиш”) қўллаб, бир йил муддатга раҳбарлик ва моддий жавобгарлик вазифалари юклатилган лавозимларда ишлаш ҳуқуқидан маҳрум қилиш билан иш ҳақининг 20 фоиз миқдорини давлат даромади ҳисобига ушлаб қолган ҳолда ҳамтовоқлар 2 йил ахлоқ тузатиш ишлари жазосига ҳукм қилинди.

Мазкур жиноят иши тафсилотлари билан Тошкент шаҳар ИИББ ҳузуридаги Тергов бошқармаси катта терговчиси, капитан Аҳрорбек Маъруфалиев таништирди.