Маънавият ойлиги доирасида Ички ишлар вазирлигига қарашли 1-сонли Тошкент академик лицейи ўқувчилари учун уч авлод учрашувлари, музейларга экскурсия, “Заковат” интеллектуал ўйинлари, китобсеварлар беллашувларикаби тадбирлар ташкил этилмоқда.

Жумладан Тошкент шаҳар ИИББ Маънавий-маърифий ишлар ва кадрлар билан таъминлаш хизмати ходимлари томонидан 1-сонли Тошкент академик лицейи ўқувчи қизлари иштирокида давра суҳбати ўтказилди. Тадбир давомида аёлларни ижтимоий ҳимоя қилиш, уларни хизмат кийими билан таъминлаш, меҳнат фаолиятини рағбатлантириш борасидаги турли масалалар муҳокама қилинди. Бундан ташқари, учрашувда ўқувчи қизлар ИИВ Академиясида мутахассислар тайёрлаш йўналишлари, кириш имтиҳонларини ўтказиш тартиби ва тизими ҳақида атрофлича маълумотларга эга бўлдилар. Тадбирда мавзуга оид видеороликлар намойиш этилди.

Шунингдек, лицей ўқувчилари Тошкент шаҳар ИИББнинг “Шон-шараф” музейига ташриф буюришди. Музей ходимлари ўқувчиларни пойтахт Ички ишлар органларининг тарихи ва бугунги кунидан ҳикоя қилувчи бой экспозиция билан таништирдилар, музейда сақланаётган ноёб экспонатлар ҳақида сўзлаб бердилар.

Лицей ўқувчиларининг навбатдаги манзили Тошкент шаҳар планетарийси бўлди. Экскурсия давомида ўқувчилар коинот ҳақидаги кўплаб қизиқарли маълумотларни билиб олдилар.