Har yili yurtimiz Ichki ishlar vazirligi tizimlarida xizmat olib boruvchi xotin-qizlar o‘rtasida “Yangi O‘zbekistonning vatanparvar ayollari” shiori ostida o‘tkazib kelinayotgan navbatdagi IV-forumiga Jizzax viloyatining eng xushhavo va go‘zal tabiatli Zomin tumani mezbonlik qildi. Forum doirasida “Eng yaxshi kitobxon ayol xodim” tanlovining final bosqichida ishtirokchilar “Badiiy asarlar bilimdoni”, “Zukkolik” bahsi hamda “Men sevgan adib” nomli shartlarni bajarish orqali o‘zlari mutolaa qilgan 3 ta badiiy asarlarning mazmun-mohiyati, unda ilgari surilgan badiiy-estetik g‘oyalar, qahramonlarning ruhiy kechinmalari, intilish va dunyoqarashlariga izohlar berish orqali o‘z tushunchalarini, kitobdan olgan taassurotlarini bayon qilishdi. Har bir kitobxonning asar haqidagi fikr-mulohazalarini diqqat va e’tibor bilan tinglagan hakamlar 1-o‘ringa Toshkent shahar IIBB Olmazor tumani IIO FMB xotin-qizlar masalalari bo‘yicha inspektori, katta leytenant Anorxol Ismoilovani, 2-o‘ringa Andijon viloyati IIB EKM katta eksperti, katta leytenant Dilbarxon Umarovani loyiq deb topishdi. 3-o‘ringa esa ikki xodima: Samarqand viloyati Samarqand shahar IIO FMB xotin-qizlar masalalari bo‘yicha inspektori, leytenant Zumrad Ibodullayeva hamda Jizzax viloyati Arnasoy tumani IIB xotin-qizlar masalalari bo‘yicha katta inspektori, leytenant Husniya Umrzoqovalar munosib topildi. Shuningdek, bilimdonlik, kitobxonlik, zehn-idrokni charxlash, aqliy salohiyatni kuchaytirishga qaratilgan mazkur anjuman doirasida “Zakovat” intellektual o‘yinining final bosqichiga ham start berildi. 18 ta jamoa qatnashib, qiziqarli va qizg‘in davom etgan bahslarda jamoalar savollarga to‘g‘ri va aniq javoblar berishga harakat qilishdi. Poytaxtimiz IIBB sharafini himoya qilgan ayollarimiz o‘z bilim va salohiyatlarini munosib namoyish etishib, faxrli 3-o‘rinni qo‘lga kiritishdi. G‘oliblarga diplom va esdalik sovg‘alari topshirildi.
Toshkent shahar IIBB rahbariyati va shaxsiy tarkibi nomidan g‘oliblarimizni g‘alaba bilan muborakbod etamiz.