Xususan, respublika miqyosida bir qator umumta’lim maktablari yo‘l harakati qoidalarini o‘rgatishga ixtisoslashtirilmoqda. Poytaxtimizning Yunusobod tumanida joylashgan 288-sonli umumta’lim maktabida ham o‘quvchilar uchun harakat xavfsizligi sinfxonalari, yo‘l harakati qoidalarini o‘rgatish maydonchasi va muzey tashkil etilgan. Bu imkoniyatlar o‘quvchilarga yo‘l harakati qoidalari, haydovchi va piyodalarning majburiyatlari hamda harakat xavfsizligi shartlarini interfaol usulda o‘rgatishga zamin yaratadi. Ta’lim muassasasiga biriktirilgan YPX inspektorlari tomonidan muntazam ravishda dars mashg‘ulotlari olib borilayotgani esa bolajonlarning mazkur yo‘nalishdagi bilimlarini oshiryapti.

– Yo‘l harakati qoidalarini o‘rgatish maydon­chasi o‘quvchilar bilimini oshirishda katta ahamiyatga ega, – deydi Toshkent shahar IIBB YHXB YPX brigadasi 3-batalyon komandirining o‘rinbosari, podpolkovnik Murodullo Toshmirzayev. — Maydonchada yo‘l belgilari, svetofor va chorraha muhiti aks ettirilgan bo‘lib, unda bevosita dars mashg‘ulotlarini o‘tamiz. Bu esa ularda amaliy ko‘nikmalarni hosil qilishda qo‘l keladi.

– Bu kabi amaliy ishlardan ko‘zlangan asosiy maqsad «Yo‘l harakati intizomi bolalikdan boshlanadi» shiorini o‘quvchilar ongiga singdirishdan iborat, – deydi maktab direktori Nodira Dadaqo‘ziyeva.

– Natijada bolajonlarimiz xavfsiz va sog‘lom bo‘lib voyaga yetishadi. Bundan tashqari, ta’lim muassasamiz yo‘l harakati qoidalarini o‘rgatishga ixtisoslashtirilganidan so‘ng o‘quvchilarimizning bu boradagi bilimlarni o‘zlashtirishga bo‘lgan qiziqishi yanada ortdi. Xususan, «Yashil chiroq» ko‘rik-tanlovining tuman va shahar miqyosida o‘tkazilayotgan musobaqalarda sovrinli o‘rinlarni qo‘lga kiritishayotgani fikrimiz tasdig‘idir.

Sarvar SOBIROV, o‘z muxbirimiz.