Ichki ishlarda xizmat qilish har kimga ham nasib emas. Kimdir forma kiyganlarga havasi bilan, kimdir sarguzasht izlab, yana birov Vatan tinchligi va osoyishtaligini ta'minlash, xalqiga xizmat qilish orzusida keladi. Bu yo‘lda turli sohalar faoliyati, turli vazifalar belgilangan. Ammo ularning barchasidan maqsad bitta – yurtda tinchlik, barqarorlikni saqlash, jinoyatchilikka qarshi kurash, huquqbuzarliklarning oldini olish, davlat, xalq manfaatlariga xizmat qilish, fuqarolarimizning emin-erkin yashashi, ishlashi, o‘qishi, ijod qilishi, hayotdan zavq olishini ta'minlashga qaratilganligini guvohi bo‘lgach, xizmat faqat jinoyat–qidiruv, quva-quv, otishma, olishuv va tergov qilishdan iborat emasligini anglaydi. Lavhamiz qahramoni Rustam Rahimberdiev ham xizmatga kirishdan oldin shunday o‘ylagandi. Rustam yurtimiz Qurolli Kuchlarida yigitlik burchini o‘tab qaytgach, xizmatni 2005 yilda Toshkent shahar “Qo‘riqlash” boshqarmasi 1-batal'oni 2-otryadi miilisioneri lavozimida, safdorlikdan ish boshladi. Davlat ahamiyatiga molik ob'ekt va inshootlarning xavfsizligini ta'minlashdek o‘ta muhim va mas'uliyatli vazifani bekamu ko‘st bajarish, ishonib topshirilgan xalq xo‘jaligi, sanoat va madaniy-ijtimoiy mol-mulklarni asrash muhim vazifa. Uning sir-asrorlarini ustozlari: otryad boshlig‘i, mayor Rustam Mahmudov, guruh boshlig‘i, kapitan Sirojiddin Raupovlardan qunt bilan o‘rgandi. Xizmatga yanada chuqurroq yondashish, bilimlarini oshirish maqsadida ustozlari maslahati va yo‘llanmasi bilan Respublika IIV Akademiyasi Serjantlar tarkibini tayyorlash oliy kurslariga o‘qishga kirdi. Uni kichik serjant unvoni bilan muvaffaqiyatli tamomlagan Rustam poytaxt Ichki ishlar bosh boshqarmasi Axborot markazi inspektorligida xizmatni davom ettirdi. Kurslarda olgan bilimlarini mustahkamlash, amaliyotda samarali qo‘llash, xizmatning o‘ziga xos “ikir-chikir”larini o‘rganish borasida ustozlari: markaz boshliq o‘rinbosari, podpolkovnik Abdurasul Abduvakilov, bosh muhandis, mayor Asror Samigov, katta inspektor, serjant Elvira Salievalar yaqindan yordam berishdi. R.Rahimberdiev ustozlarining nomlarini hali-hanuz chuqur ehtirom va hurmat bilan tilga oladi. Bugungi kunda katta serjant Rustam Rahimberdiev Toshkent shahar IIBB Huquqiy statistika va tezkor-hisob ma'lumotlar markazi mutaxassisi bo‘lib faoliyat yuritar ekan, jinoyatlar hisobini to‘g‘ri yuritish, sud qarorlarini ijrosini qaydlash, qayta ishlash, jinoyat ishlarining harakati va yakuniy qarorlari, oylik, chorak, yarim va yillik hisobotlar, statistik hisobotlarni tayyorlashda faol. Faoliyati davomida o‘z ustida ko‘proq ishlashi, malakasini oshirish lozimligini anglagan Rustam ayni paytda IIV Akademiyasida sirtdan tahsil olmoqda. Zimmasidagi vazifalarni sidqidildan bajarish barobarida turmush o‘rtog‘i Kamolaxon bilan birgalikda ikki o‘g‘il va bir qizni yurt koriga yaraydigan, sog‘lom fikrli, bilimli va barkamol insonlar bo‘lib yetishishi yo‘lida tarbiyalab kelishmoqda. To‘ng‘ich farzandi Ibrohim Respublika IIV 1-sonli Akademik liseyning 2-bosqichida tahsil olayotgan bo‘lsa, qizi Ziyoda va kenjasi Umarjon hali maktab o‘quvchilari. Ishonch bilan ta'kidlash mumkinki, farzandlari ota izidan borib, xalqqa xizmat qilish qatorida ota-ona yuzini yorug‘ qilibgina qolmay, olqish va saodat keltiradi.