Tergovchi xonasidan olib chiqilarkan Muzrob:
– Men hali senga ko‘rsatib qo‘yaman, tug‘ilganingga pushaymon yeysan, shoshmay tur... – va yana nimalarnidir ming‘irlab, dag‘dag‘a va po‘pisa bilan olaygancha chiqib ketdi.
Bunday tahdidlarni ko‘p bora eshitgan Shahnoza Zaripova garchi yoqimsiz bo‘lsa-da, ularni hissiyotlarsiz qabul qilishga o‘rgandi. Endi ish boshlaganida jinoyatchilardan biri unga jarohat yetkazish va qo‘rqitish maqsadida so‘roq-tergov jarayonida himoya oynasini sindirishga uringani yodiga tushdi. Ha, ustozi Yakkasaroy tumani IIO FMB Tergov bo‘limi katta tergovchisi, podpolkovnik Fotima To‘laganova “Tergovchilik oson ish emas, tahdid va qo‘rqitishlar, kamsitish, noo‘rin so‘zlar eshitishga to‘g‘ri keladi. Sen esa o‘zingni yo‘qotmasliging, shaxsiy adovat tuyg‘usiga berilmasliging kerak”, deganlarida qanchalik haq ekan.
Oilada yolg‘iz qiz bo‘lgan Shahnoza IIV Akademiyasi Tergov fakultetiga hujjatlarini topshirganida, ko‘p yillardan beri o‘qituvchilik qilib kelayotgan otasi O‘ktamjon aka “Qizim, onang va menga o‘xshab taʼlim sohasini tanlasang bo‘lmaydimi, qiynalib qolasan-ku!”, deb qaytarmoqchi ham bo‘lgandi. Biroq Shahnoza o‘z orzusiga erishdi. 2017 yilda IIV Akademiyasini muvaffaqiyatli tugatib, yuqorida qayd etilgan dargohda ish boshladi. Ustozining o‘gitlari va bevosita nazorati ostida tovlamachilik jinoyatini to‘liq ochishga erishdi. Voqea tafsiloti esa bunday bo‘lgandi. 19 yoshga to‘lmagan Rohatoy (ismlar o‘zgartirilgan) telefon orqali Botir bilan tanishib, uchrashuvga chaqiradi. Oradan ozgina muddat o‘tib, birga toqqa borishni u yerda bir go‘shani ijaraga gaplashib qo‘yganini aytadi. Botir rozi bo‘ladi. U yerdagi voqealarni yashirin videotasvirga olgan Rohatoy oz vaqt o‘tib, Botirdan pul talab qila boshlaydi. Avvaliga Botir sharmanda bo‘lmaslik uchun qizga aytilgan pullarni berib turadi. Qizning kundan kunga “ishtahasi” hakalak otib, buncha pul topib bera olmasligiga ko‘zi yetsa-da, atay juda katta pul berishi yoki uylanishini talab qilishga o‘tadi. Nochor qolgan yigit ichki ishlar idoralariga murojaat qilishga majbur bo‘ladi.
– Rohatoyga nisbatan O‘zbekiston Respublikasi Jinoyat kodeksining 165-moddasi bilan jinoyat ishi qo‘zg‘atilib, ish sudga oshirilganda ham ayol va uning yaqinlari tomonidan yuqoridagi do‘q-po‘pisalarni eshitishimga to‘g‘ri kelgandi, – deydi Shahnoza.
Shundan so‘ng giyohvandlik vositalari yoki psixotrop moddalarni o‘tkazish maqsadini ko‘zlab, qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish bilan bog‘liq jinoyatni tergov qilgan Sergeli tumani IIO FMB Tergov bo‘limi tergovchisi, mayor Shahnoza Zaripova giyohvandlik savdosini izga qo‘ygan bir necha shaxslardan iborat guruhni fosh qilib, Jinoyat kodeksi va Kodeks normalarini to‘g‘ri qo‘llagan holda jinoyat ishini sudga yubordi. Bugungi kunda jinoyat turlaridan qatʼiy nazar ishonib topshirilgan qonunbuzilish holatlarini to‘liq va xolisona tergov qilayotgan Shahnoza ikki farzandning onasi, oqila uy bekasi.
– Turmush o‘rtog‘im va ularning ota-onasi qo‘llab-quvvatlamaganida, yaqindan yordam bermaganida tabiiyki, juda qiynalgan bo‘lar edim, – deydi Shahnoza. – Baxtimga ular hamisha sog‘u omon bo‘lishsin.
Qahramonimiz Shahnozaga o‘z sohasida yana-da katta yutuqlarga erishishini tilab qolamiz.