Qurbon (ism-sharifi o‘zgartirilgan) 33 yoshida sevib qoldi. U bu haqda bor ovozi bilan hayqirgisi kelar, baʼzan tuyg‘ularini jilovlay olmas, bu esa sirini fosh etib qo‘yardi. Hissiyotlarga berilgan Qurbon o‘zini  ishq yo‘lida har narsaga tayyor bo‘lgan oshiq yigitdek  tuta boshladi. Bir necha yillardan buyon birgalikda yashab, erining yurish-turishidan xabardor bo‘lgan turmush o‘rtog‘i erining xulq-atvori o‘zgarib qolganini sezib, uchinchi odam oilasiga aralashganini  sezdi. Shunga qaramay, erining jizzakiligi, tuturiqsiz feʼlini bilgan  ayol  asossiz rashk  qilishdan o‘zini tiydi. Vaziyatni  keskinlashtirishni istamadi. Biroq oyni  etak bilan yopib bo‘lmaganidek,  yaqinlari Xolidaga erini bir necha bor bir ayol bilan ko‘rganini aytishardi. Hojatbarorlar unga hatto eri uchrashib yuradigan ayolning telefon raqamlari va ota-onasi yashaydigan manziligacha aniqlab berishdi. Bir tomondan rashk, ikkinchi tomondan  jizzakilik  jinoyatning asosiy sababchisi bo‘ldi.

O‘sha mashʼum kunda Qurbon hech kim suhbatini eshitmasligiga ishongan holda, sevgilisiga qo‘ng‘iroq qildi. Ammo ostonada g‘azablangan xotinini ko‘rib, gapi og‘zida qoldi. Janjal boshlandi. Xotini uning barcha kirdikorlarini, kamchiliklarini aytib tashlarkan, eng og‘ir  kunlarida birga bo‘lganini eslatib dag‘dag‘aga o‘tdi. Shu o‘rinda qahramonimizni ikki marta  qora kursida  o‘tirganini eslatib o‘tmoqchimiz. Xotini uning xurmacha qiliqlariga chidashi mumkinligi, biroq boshqa ayolning paydo bo‘lishini xoinlik deb, bunga chidab bo‘lmasligini aytdi. Qurbon janjal yaxshilik bilan tugamasligini sezib, uydan chiqib ketdi va  qahvaxonaga borib, yegulik va spirtli ichimlikka buyurtma berdi. Bir ozdan so‘ng maʼshuqasi unga qo‘ng‘iroq qildi. Bu vaqtda u  o‘ziga yarasha mast bo‘lib qolgandi. Go‘shakni ko‘targan Qurbon baqir-chaqirni eshitarkan, xotini va onasining ovozini aniq-tiniq eshitdi. maʼshuqasi haqorat va do‘q-po‘pisalar uning ota uyida bo‘layotgani, qo‘ni-qo‘shnilar ham eshitayotgani, sharmanda bo‘lganini, sababchisi Qurbon ekanligini qayta-qayta takrorlardi. U yordamga shoshildi. Tezda hisob-kitob qilgan Qurbon yeldek uchib sevgilisining uyi oldida paydo bo‘ldi.U sevgilisiga qo‘ng‘iroq qilib oldiga chiqishini so‘radi. Darvoza eshigi ochilib, sevgilisi emas uning akasi Murod chiqib, oshiqqa singlisini boshqa bezovta qilmasligini, tinch qo‘yishini aytdi. Biroq u muhabbati haqiqiy ekanligini isbotlashga urindi.  Murod  oshiqning mastligini ko‘rib, gaplashish befoyda ekanligini  tushundi va gap tugadi degandek ortiga burilganda,  Qurbon sumkasidan pichoq olib: “Senlarmi sevgimga to‘g‘anoq bo‘ladigan, hammangni so‘yib tashlayman”, deb to‘polon ko‘tarib, Murodga tashlandi. Murodning o‘ng oyog‘iga pichoq sanchildi.

Mazkur holat yuzasidan Mirobod tumani IIO FMB Tergov bo‘limi tomonidan O‘zbekiston Respublikasi Jinoyat kodeksining 277-moddasi 3-qismi (“Bezorilik”) bilan jinoyat ishi qo‘zg‘atilgan. Dastlabki tergov yakuni bo‘yicha to‘plangan hujjatlar o‘rnatilgan tartibda ko‘rib chiqishlik uchun ayblov xulosasi bilan sudga yuborildi.

Jinoyat ishlari bo‘yicha Toshkent shahar Mirobod tumani sudining hukmiga ko‘ra, 33 yoshli Qurbonning hatti-harakatlariga qonuniy baho berilib, bezorilik jinoyatini sodir etishda aybli deb topildi. Sud tomonidan unga uch yil ozodlikdan mahrum qilish jazosi belgilandi.