O‘zbekiston Respublikasi Prezidenti tomonidan imzolangan PQ-1 sonli Qarorga ko‘ra, 2025 yilda har bir mahallada huquqbuzarliklarning barvaqt oldini olish ustuvor vazifa etib belgilangan. Poytaxtimizda ham mazkur Qaror ijrosi qanday taʼminlanayotganini o‘rganish ishlari davom etmoqda.

Toshkent shahar IIBB boshlig‘ining o‘rinbosari polkovnik Aliaxmed Choriyev Yashnobod tumanidagi 3-sektor hududida joylashgan va qizil toifaga kiritilgan “Barkamol” mahallasida bo‘lib, qaror ijrosi bo‘yicha olib borilayotgan ishlar bilan tanishdi. Mahalla hududida jami 30 ta ko‘p qavatli uylar mavjud bo‘lib, ulardagi xonadonlar soni 1 905 tani tashkil qiladi. Ushbu xonadonlarda 4 831 nafar aholi istiqomat qiladi.

O‘rganish jarayonida mahalla yettiligi tomonidan shu hududida yashovchi – huquqbuzarlik va jinoyat sodir etishga moyilligi bo‘lgan shaxslar bilan olib borilayotgan profilaktik-ogohlantirish ishlar tekshirildi. Masʼullar tomonidan mahalla hududida joylashgan ko‘p qavatli uylarning kirish qismiga o‘rnatilgan videokuzatuv kameralari sozligi ko‘zdan kechirildi.

Tasdiqlangan rejaga muvofiq, Qaror ijrosini taʼminlash yuzasidan mahalla hududida 900 metr masofadan iborat “Namunali va xavfsiz yo‘lak” tashkil etilib, 4 dona “FACE ID” kameralar o‘rnatiladi hamda qo‘shimcha piyoda yo‘nalish tashkil etiladi.

Mazkur mahallada shu kunga qadar 4 ta ko‘p qavatli uylarning kirish qismiga jami 11 ta “tashvish” tugmalari o‘rnatilib, qolgan 19 ta ko‘p qavatli uylarning barcha yo‘laklariga ham o‘rnatish rejalashtirilgan.

Bosh boshqarma boshlig‘ining o‘rinbosari tomonidan mahallada mazkur qaror asosida amalga oshirilayotgan ishlar o‘rganilib, kelgusidagi chora-tadbirlar yuzasidan topshiriqlar berildi.

Poytaxtimiz mahallalarida xavfsiz muhitni yaratish borasidagi ishlar davom ettirilmoqda.