O‘zbekiston Respublikasi Qurolli kuchlari tashkil etilganligining 33 yilligi hamda Vatan himoyachilari kuni munosabati bilan joylarda bayram tadbirlari keng nishonlanmoqda. Zero, Yurtini himoya qilish, xalq tinchligi va osoyishtalikni ta’minlash yo‘lini tanlagan har bir shaxs Vatan himoyachisi sanaladi.
Sana munosabati bilan Toshkent shahar IIBBDA tashkil etilgan bayramda bosh boshqarma va quyi tizimlar rahbariyati, shaxsiy tarkibi va faxriylar ishtirok etdi. Tadbir boshida jangovor bayroq olib kirilib, yurtimiz madhiyasi yangradi. So‘ng poytaxt IIBB boshlig‘i general-mayor Aziz Tashpulatov ishtirokchilarga Ichki ishlar vaziri general-leytenant Pulat Bobojonovning ichki ishlar organlari va faxriylariga bayram tabrigini o‘qib eshittirdi.
Bosh boshqarma boshlig‘i A.Tashpulatov mamlakatimiz xavfsizligini ta’minlash, yurt osoyishtaligini saqlashda kuch tuzilmalarining muhim bo‘g‘inlaridan biri – ichki ishlar organlari xodimlarining vafizasi yuksak ekanligini alohida ta’kidladi. Tizimda amalga oshirilayotgan keng ko‘lamli islohotlar natijasida har bir xodim Vatanga va xalqqa sadoqat bilan xizmat qilishni oliy burchi deb biladigan, barcha sa’y-harakatlar inson qadri uchun yo‘naltirilgan professional tuzilmagan aylanayotganligi e’tirof etildi.
Tadbirda Ichki ishlar vazirining buyrug‘iga asosan, shuningdek bosh boshqarma boshlig‘ining buyrug‘iga asosan mukofotlangan xodimlarga idoraviy ko‘krak nishonlari, maxsus unvonlar va faxriy yorliqlar tantanali ravishda topshirildi.
Tadbir so‘ngida Toshkent shahar IIBBning “Nihol” jamoasi tomonidan sahnalashtirilgan badiiy chiqishlar va vatanparvarlik ruhidagi kuy-qo‘shiqlar yangradi.