Toshkent shahar IIBB shaxsiy tarkibi bilan o‘tkazilgan navbatdagi Maʼnaviyat va maʼrifat darsi “O‘zbek tili – o‘zligimiz timsoli” mavzusiga bag‘ishlandi. Tadbirda Alisher Navoiy nomidagi Toshkent davlat o‘zbek tili va adabiyoti universiteti vakili Abdumurod Tilavov maʼruza qildi. U o‘z nutqida, o‘zbek tili jonajon Vatanimizda yashayotgan barcha fuqarolarimiz uchun aziz va qadrli tilga aylanishi, uning jozibadorligini oshirish uchun barcha kuch va imkoniyatlarni safarbar etishimiz zarurligini taʼkidlab o‘tdi. Zero, til – o‘zligimizni anglash ramzi, unga bo‘lgan hurmat, xalqimizga, uning betakror madaniyati va tarixiga hurmatdir.

Tadbir yakunida yig‘ilish ishtirokchilarga “Tahlilnoma” axborot dasturi hamda “Saylov-2024” nomli videorolik namoyish etildi.

Shuningdek, 21 oktyabr - "O‘zbek tili bayrami" kuni munosabati bilan O‘zbekiston Respublikasi IIV 1-sonli Toshkent akademik litseyida “Siz tilni asrangiz!” shiori ostida tadbir bo‘lib o‘tdi. Ushbu bayram tadbiriga mehmon sifatida o‘zbek romanchiligi asoschisi Abdulla Qodiriyning nabirasi Mahzuna Qodiriy tashrif buyurdilar.

Bir-biridan mazmunli sahna ko‘rinishlari hamda iqtidorli o‘quvchilarning ifodali sheʼr va qo‘shiqlar aytishi barchani birdek quvontirdi. Tadbir ko‘tarinki ruhda o‘tkazilib, o‘quvchilar ushbu bayramdan ham maʼnaviy ham madaniy ozuqa olishdi.