Toshkent shahar IIBB HPB bir guruh mas'ullari O‘zbekiston Respublikasi IIV Akademiyasining Huquqbuzarliklar profilaktikasi yo‘nalishida tahsil olayotgan 2 va 3-bosqich tinglovchilari bilan mahorat saboqlari mashg‘ulotlarini o‘tkazishdi. Dastlab poytaxt hududida yoshlar va voyaga yetmaganlar tomonidan sodir etilayotgan jinoyatlar, huquqbuzarliklarning holati, xotin-qizlar o‘rtasida qayd etilayotgan jinoyatchilik holatlari va ularning tahlillari tumanlar kesimidagi ma'lumotlar tinglovchilar e'tiboriga havola etildi. Aholining bu qatlami ishtirokidagi jinoyatlar va huquqbuzarliklarning oldini olishga qaratilgan chora-tadbirlar haqida ma'lumot berilgach, ularning oldini olish bo‘yicha tinglovchilarning ham fikri, taklifini o‘rganish maqsadida ochiq muloqot o‘tkazildi. Tabiiyki, ochiq muloqot qizg‘in bahs va munozaralarga sabab bo‘ldi. Tinglovchilar o‘z fikrlari va takliflarini dadil bayon etishdi. Tinglovchilarning o‘z kasblariga bo‘lgan qiziqishi va ijobiy yondashishlari yig‘ilganlarning e'tiboridan chetda qolmadi. Uchrashuv so‘ngida xodimlar tinglovchilarning savollariga batafsil javoblar berishdi. Faol tinglovchilarga badiiy va darslik kitoblari va uslubiy qo‘llanmalar tarqatildi. IIV akademiyasi rahbariyati bu kabi har ikki tomon uchun foydali va zarur bo‘lgan muloqotlarni tez-tez o‘tkazib turish lozimligini ta'kidlab, IIBB rahbariyatiga o‘z minnatdorligini bildirdi.