O‘zbekiston Respublikasi IIV 1-sonli Toshkent akademik litseyida o‘quvchilarni vatanparvarlik ruhida tarbiyalash, o‘z hayotini huquq-tartibot organlari kasbi bilan bog‘lashga tayyor bo‘lishga qaratilgan maqsadli ishlar amalga oshirilmoqda. Bu yerda ichki ishlar organlarining sohaviy bo‘linmlari xodimlari va rahbarlari, turli vazirlik va idoralar vakillari, taniqli insonlar, aktyor va sportchilar bilan muntazam uchrashuvlar o‘tkazilmoqda.

Yaqinda taʼlim muassasasida yana bir tarbiyaviy va kasb-hunarga yo‘naltiruvchi tadbir bo‘lib o‘tdi, unda Yashnobod tumani sudyasi M.Matchanov ishtirok etdi.

Ochiq muloqot davomida litsey o‘quvchilari sudlarning bugungi kundagi faoliyati, ularning ish sharoitlari, shuningdek, sudyalik kasbi va ushbu lavozim bilan bog‘liq masʼuliyat darajasi bilan yaqindan tanishtirildi.

Shu bilan birga, Mirzo Ulug‘bek tumani IIO FMB Yoshlar masalalari bo‘yicha katta inspektori o‘quvchilar bilan uchrashib, IIO xodimi kasbi xizmat vazifalarini namunali bajarish, maksimal fidoyilikni talab etishini taʼkidladi. Litsey o‘quvchilari to‘g‘ri tanlov qilib, huquq-tartibot idoralari xodimlari safiga qo‘shilishi, mamlakatimizda jamoat xavfsizligini mustahkamlashga munosib hissa qo‘shishiga ishonch bildirdi.

Bundan tashqari, litseyda xalqaro toifadagi sport ustasi, ikki karra olimpiada chempioni, ikki karra jahon chempioni, "O‘zbekiston iftixori" Bahodir Jalolov hamda akademik litsey o‘quvchilari ishtirokida ochiq muloqot bo‘lib o‘tdi.

Ochiq muloqotda bugungi kunda mamlakatimizda sportga qaratilayotgan eʼtibor, yaratilayotgan shart-sharoitlar, yoshlar uchun sog‘lom jismoniy va maʼnaviy muhit yaratishning ahamiyati haqida fikr-mulohazalar bildirildi.

Jamoat xavfsizligini taʼminlashga o‘zini bag‘ishlash ishtiyoqi bilan to‘lgan litsey o‘quvchilari ko‘plab savollariga javob oldilar.