O‘lkamizda bahor tarovati. Tabiat uyg‘onish, gullash va yashnash taraddudida. Tabiatu insonlar ajib harakatga tushadi. Quyoshning ham jilmayishi o‘zgacha. Uning iliq va yoqimli nurlari qalblarni uzoq qishki mudroqdan uyg‘onishga, ilhomlanishga undaydi. Yurakning tub-tubidan kuy-navo, she’r oqib kela boshlaydi. Bu bejizga emas. Ko‘klamning ilk kuni bahor, tinchlik, sadoqat, vafo, go‘zallik va nafosat kuychisi, elimizning ardoqli shoirasi Zulfiyaxonimning tavallud kuni bilan boshlanadi.
Kuni kecha poytaxt IIBB Voyaga yetmaganlarga ijtimoiy-huquqiy yordam ko‘rsatish Markazida O‘zbekiston xalq shoirasi, o‘zbek ayolining sadoqat va vafo timsoli bo‘lgan Zulfiyaxonim tavalludining 110-yilligi munosabati bilan “Bahor keldi seni so‘roqlab” mavzusida ma’rifiy-badiiy kecha tashkil etildi. Ushbu kechada shoira Zulfiyaxonimning hayot va ijod yo‘li, bahor fasliga bo‘lgan, yorga sog‘inchi aks etgan mumtoz she’rlari yangradi. Unda Markaz boshlig‘i o‘rinbosari, mayor Gulchehra Soyupova hamda markaz tabiyalanuvchilari va mehmonlari ishtirok etishdi. Tarbiyalanuvchilar tomonidan barchaning ko‘nglidan birdek joy olgan diltortar she’rlar o‘qilgan bo‘lsa, Toshkent davlat konservatoriyasining bir guruh talabalari tomonidan Zulfiyaxonim ijodidan el ardog‘iga aylanib, kuyga solingan qo‘shiqlar mahorat bilan ijro etildi. Shuningdek, badiiy kechada Markaz tarbiyalanuvchilariga Zulfiyaxonimning nafaqat shoira, balki tarjimon sifatida yuritgan faoliyati, tarjimalaridan namunalar, badiiy ijodiyotda erishgan qator yutuqlari bo‘yicha ham ma’lumotlar berildi. Sahnaga chiqqan har bir talaba san’at va ijodiyotdagi mahoratlarini namoyish qilish bilan birga voyaga yetmaganlarga o‘z oldilariga aniq ezgu maqsad va rejalar qo‘yish, ularni amalga oshirish bo‘yicha dadil qadamlar tashlash, kurashish zarurligi, har bir yutuqlar zamirida tinimsiz mehnat yotishi, harakat va shijoat bilan yengib o‘tilsagina zafarlar yor bo‘lishiga ruhlantirirdilar. Bu kabi tadbirlar buyuk siymolar adabiy merosini yanada ko‘proq o‘rganish bilan birga yosh avlodni milliy qadriyatlarimizga hurmat ruhida tarbiyalashda muhim ahamiyat kasb etib, ularning ma’naviy kamolotiga katta hissa qo‘shadi. Badiiy kecha barchaga manzur bo‘lib, unutilmas taassurotlar qoldirdi.