Ўзбекистон Республикаси Президенти томонидан имзоланган ПҚ-1 сонли Қарорга кўра, 2025 йилда ҳар бир маҳаллада ҳуқуқбузарликларнинг барвақт олдини олиш устувор вазифа этиб белгиланган. Пойтахтимизда ҳам мазкур Қарор ижроси қандай таъминланаётганини ўрганиш ишлари давом этмоқда.

Тошкент шаҳар ИИББ бошлиғининг ўринбосари полковник Алиахмед Чориев Яшнобод туманидаги 3-сектор ҳудудида жойлашган ва қизил тоифага киритилган “Баркамол” маҳалласида бўлиб, қарор ижроси бўйича олиб борилаётган ишлар билан танишди. Маҳалла ҳудудида жами 30 та кўп қаватли уйлар мавжуд бўлиб, улардаги хонадонлар сони 1 905 тани ташкил қилади. Ушбу хонадонларда 4 831 нафар аҳоли истиқомат қилади.

Ўрганиш жараёнида маҳалла еттилиги томонидан шу ҳудудида яшовчи – ҳуқуқбузарлик ва жиноят содир этишга мойиллиги бўлган шахслар билан олиб борилаётган профилактик-огоҳлантириш ишлар текширилди. Масъуллар томонидан маҳалла ҳудудида жойлашган кўп қаватли уйларнинг кириш қисмига ўрнатилган видеокузатув камералари созлиги кўздан кечирилди.
Тасдиқланган режага мувофиқ, Қарор ижросини таъминлаш юзасидан маҳалла ҳудудида 900 метр масофадан иборат “Намунали ва хавфсиз йўлак” ташкил этилиб, 4 дона “FACE ID” камералар ўрнатилади ҳамда қўшимча пиёда йўналиш ташкил этилади.
Мазкур маҳаллада шу кунга қадар 4 та кўп қаватли уйларнинг кириш қисмига жами 11 та “ташвиш” тугмалари ўрнатилиб, қолган 19 та кўп қаватли уйларнинг барча йўлакларига ҳам ўрнатиш режалаштирилган.
Бош бошқарма бошлиғининг ўринбосари томонидан маҳаллада мазкур қарор асосида амалга оширилаётган ишлар ўрганилиб, келгусидаги чора-тадбирлар юзасидан топшириқлар берилди.
Пойтахтимиз маҳаллаларида хавфсиз муҳитни яратиш борасидаги ишлар давом эттирилмоқда.