Ota o‘giti hamisha yodida
“O‘g‘lim, halol ishlayman, nohaqlik qilmayman, birovlarning ko‘ngliga besabab ozor bermayman, desang tanlagan kasbu koringga baraka, oq fotiha beraman”, degandi umrining oxirigacha oddiy ishchi bo‘lib mehnat qilib ro‘zg‘or tebratgan Ravshan aka o‘g‘li Bahromga. Mana shunga ham o‘n besh yildan oshibdi. Otasining bu so‘zlari ichki ishlar idoralarida ishlashni maqsad qilgan Bahromning qalbiga muhrlanib, hanuzgacha qulog‘i ostida jaranglab turadi. Bahrom Yuldashev O‘zbekiston Qurolli kuchlarida yigitlik burchini o‘tab qaytishi bilan Toshkent shahar IIBBGA hujjatlarini topshirdi. 2009-yilda Olmazor tumani IIBDA safdor haydovchi lavozimida ish boshladi. Birinchi navbatda hududdagi har bir ko‘cha, mahalla, bino va inshootlar, korxona tashkilotlarning joylashuvi, qaysi manzilga qancha vaqtda yetib borish lozimligi tartibini o‘rgandi. E’tiborini xizmat vazifalari, fuqarolar bilan muloqot jarayonlari, meyoriy hujjatlar bilan ishlash, jinoyat va huquqbuzarliklar sodir etilgan joylarga chiqishda birinchi navbatda qilinadigan ishlar, diqqat beriladigan narsalarga qaratdi. Kasbiy va jismoniy tayyorgarligiga katta e’tibor berdi. Holbuki, odamlar gavjum joylarda bemaqsad yurgan, shubhali xatti-harakatlar qilgan fuqarolarning shaxsiga aniqlik kiritish maqsadida tuman ichki ishlar bo‘limiga keltirish chog‘ida ayrimlar qarshilik ko‘rsatardi. Kuchli jismoniy qarshilik ko‘rsatgan yoki shaxsini yashirib, turli vajlarni ro‘kach qilib, yalinib-olvorganlar, pora taklif qilganlarning aksariyati jinoyat sodir etib tergov va sud idoralaridan qochib yurganlarni tashkil qilardi. Shu bois ular osonlikcha xodimlar talablariga bo‘ysinishmasdi. O‘z xizmat vazifalariga vijdonan yondashgan, topshiriqlarni o‘z vaqtida bajarib kelayotgan safdor Bahrom Yuldashev 2017-yilda Olmazor tumani 3-sonli IIB navbatchilik qismiga so‘ngra tumandagi 4-son IIB navbatchilik qismi navbatchi yordamchisi lavozimiga o‘tkazildi. Uning fuqarolar bilan xushmuomalasi, murojaatlariga tezkor munosabati, qismga tushayotgan murojaatlarni ijrochiga tezkor yetkazishda mas’uliyati rahbariyat tomonidan e’tiborsiz qolmayapti. Qator faxriy yorliqlar, tashakkurnomalar bilan taqdirlanib kelinmoqda. O‘z ishiga jonkuyarligi, fidoyi yondashuvi tufayli hamkasblari orasida hurmat va obro‘ qozongan. Negaki, hech qachon o‘z navbatchiligidagi ishlarni oxiriga yetkazmay ketmaydi. Hamkasblarining fikri va mulohazalariga befarq emas, zarur vaqtlarda kerakli yordam ko‘rsata oladi. Ayni paytda safdor Bahrom Yuldashev turmush o‘rtog‘i Ma’rifatxon bilan birgalikda 5 nafar – 3 qiz va 2 o‘g‘ilni yurtimizning munosib farzandlari qilib tarbiyalab kelmoqda. Bahrom ularning tarbiyasiga hamisha vaqt topib, ularning bilimli va barkamol bo‘lishlariga katta e’tibor beradi. Muvaffaqiyatlari quvontirsa, xatolarini to‘g‘irlashga birgalikda harakat qiladi. Farzandlar tarbiyasida asosiy e’tibor - nazorat hamda do‘stlari kimligi, yon-atrofidagilar kimlar, bo‘sh vaqtini qanday o‘tkazayotganligidan hamisha xabardor bo‘lish, imkon qadar ularni foydali mehnat va mashg‘ulotlarga jalb qilish, deb hisoblaydi. Farzand tarbiyasiga befarq bo‘lmagan oilada voyaga yetgan bolalarning Vatani va xalq ishonchini oqlashi, barkamol insonlar bo‘lib yetishishiga shubha yo‘q.
