Joriy yilning 4-fevral kuni tasvirga tushirilgan va internet tarmog`ida tarqalayotgan videoda noma’lum shaxs uyidan chiqib, miltiq bilan noma’lum tomon yo`l olgani ko`rinib turibdi. Keyinchalik, 12-fevral kuni “Mehr va Oqibat” NNT hayvonlarni himoya qilish jamiyati vakillari fuqaro M.N.ning arizasini Mirobod tumani IIO FMBga yetkazdilar. Xabarda ayol o`z qo`shnisi – pnevmatika miltig`idan mushuk va itlarni mo`ljalga oladigan Mirobod tumanida yashovchi 29 yoshli Inomjon А.ga nisbatan chora ko`rishni so`rardi.
Toshkent shahar IIBB xodimlari ushbu murojaatni e’tiborsiz qoldirmadilar. Inomjon А.ga nisbatan O`zbekiston Respublikasi Ma’muriy javobgarlik to`g`risidagi kodeksining 111-moddasi 1-qismi (“Hayvonlarga nisbatan shafqatsiz munosabatda bo`lish”) bo`yicha bayonnoma rasmiylashtirildi. Hujjatlar sudga yo`naltirildi.

Mirobod tumani ma'muriy ishlar bo‘yicha sudi Inomjon A.ni O‘zbekiston Respublikasi Ma'muriy javobgarlik to‘g‘risidagi kodeksining yuqorida qayd etilgan moddalari bo‘yicha aybdor deb topdi va unga nisbatan 15 sutkalik ma'muriy qamoq belgiladi.