Бугун Тошкент шаҳар ИИББда навбатдаги маънавий-маърифий тадбир ўзгача руҳда ўтди. Профессионал бокс кечаси, бокс бўйича биринчи Халқаро мусобақа, дзюдо бўйича Осиё чемпионати, шунингдек «Ватанпарварлик ойлиги» доирасида Тошкент шаҳар ИИББ тергов тизими ходимлари ўртасида спортнинг “кўпкураш” тури бўйича ўтказилган мусобақа ғолиблари тақдирланди. Бу мусобақаларда муносиб қатнашиб, совринли ўринларни эгаллаган Бош бошқарманинг бир қатор ходимларига ИИББ бошлиғи генерал-майор Азиз Ташпулатов эсдалик совғалари ва пул мукофотларини топширди. Жумладан, пойтахтимизда бўлиб ўтган профессионал бокс кечасида катта лейтенант Шаҳобиддин Зоиров ғолиб бўлди. Қувайтнинг Ал-Қувайт шаҳрида бокс бўйича биринчи халқаро мусобақада сафдор Абдумалик Халоқов олтин медални қўлга киритди. Қозоғистон Республикасининг Нурсултон шаҳрида бўлиб ўтган дюздо бўйича Осиё чемпионатида сафдор Мухриддин Тиловов фахрли учинчи ўринни эгаллади. Азиз Ташпулатов спортчиларни қутлаб, уларни мусобақалардаги маваффақиятли иштироки билан табриклади ҳамда келажакда уларни янги ғалабалар кутиб турганлигига ишонч билдирди.

Тадбир давомида Халқаро Ислом Академиясининг Халқаро муносабатлар кафедраси мудири, сиёсий фанлар доктори, профессор Мухаммадолим Мухаммадсидиқов “Шанҳай ҳамкорлик ташкилоти Самарқанд саммити - тарихий аҳамиятга молик воқеа” мавзусида маъруза қилди. Жумладан, маърузачи Самарқанд шаҳрида ўтказиладиган ШҲТ саммитида минтақада барқарорлик ва хавфсизликни таъминлаш, ташкилот салоҳиятини кучайтириш, ўзаро ҳамкорликни чуқурлаштириш зарурлигини ҳамда транспорт соҳасида ўзаро боғлиқлик, “яшил” энергетика, инновациялар, рақамли иқтисодиёт, саноат кооперацияси борасидаги қўшма лойиҳаларни амалга ошириш каби масалаларга алоҳида эътибор қаратилганлигини таъкидлаб ўтди.