Бекмурод илк бор 2003 йилда ўғирлик жинояти учун судланганида ҳакамлар унинг пушаймонлиги чин кўнгилдан эканлигига, қайта жиноятга қўл урмаслик ҳақида берган ваъдаларига ишонган, муқаддам судланмаганлигини инобатга олиб, унга жарима жазоси тайинлаган эди. Бироқ унинг ваъдалари жаримани тўлаб қутулгунча бўлди. 2006 йилда у яна жиноятга қўл урди. Бироқ бу ҳам унга сабоқ бўлмади. Бу орада уч фарзанднинг отасига айланди. Аммо рўзғор, тирикчилик ташвишлари уни камроқ ўйлантирар, рўзғор асосан ота-онаси, турмуш ўртоғининнг гарданида эди. 2024 йилнинг 27 май куни соат 12.00 ларда у Яшнобод туманидаги “Фазогир” маҳалласида айланиб юриб, кўп қаватли уйларнинг олдида турган “Оникс” автомашинасига кўзи тушди. Унинг эътиборини тортган нарса – автомашина ойнасининг очиқлигида эди. У аввало ён-атрофга боқди. Ҳеч ким йўқ. Аста автомашина олдига бориб очиқ ойнасидан мўралади. Ўриндиқда нархи 6.470.000 сўм бўлган “Samsung А 55” русумли уяли телефонини кўриб, қўл узатди. Уни қўлга киритди-ю жуфтакни ростлади.
Дўкондан чиққан Г.Альбина ўғирликни пайқаб дарҳол ички ишлар органларига қўнғироқ қилди.
– Халқимиз жуда раҳмдил ва инсонпарвар, – дейди Яшнобод тумани ИИО ФМБ ҳузуридаги Тергов бўлими терговчиси, лейтенант Нуриддин Рамазонов. – Аввалида ўғриларнинг қўлини кесиш кераклиги, жазони қаттиқлаштириш, раҳм-шафқат қилмаслик кераклиги ҳақида гапираётган жабрдийда олдида сувга тушган бўлка нондек шалвираб, мунғайиб аёлга ялинганнамо қараб ўтирган айбдорга раҳми келиб, унга енгилроқ жазо бериш ҳақида илтимос қилди. Суд буни инобатга олди.
Жиноят ишлари бўйича Яшнобод туман суди очиқ суд мажлисида 1981 йилда туғилган, маълумоти ўрта, вақтинча ишсиз, муқаддам бир неча бор судланган, уч нафар фарзанди бўлган И.Бекмуроднинг қилмишларини кўриб чиқиб, уни Ўзбекистон Республикаси Жиноят кодексининг 169-моддаси 3-қисми “а” банди (“Ўғирлик”) билан айбли деб топди. Унинг қилмишига пушаймонлиги, соғлиғидаги жиддий муаммоларни инобатга олиб, Жиноят кодексининг 57-моддасини қўллаган ҳолда 3 йилга озодликни чеклаш жазосига ҳукм қилди.