Хабарингиз бор 2024 йилнинг 8 августида “Тошкент шаҳар ИИББ расмий канали” сайтида Юнусобод туман ИИО ФМБ ҳузуридаги Тергов бўлими катта терговчиси, капитан Фахриддин Шариповнинг хизмат ва спорт фаолияти бўйича эришаётган ютуқлари ҳақида “Хизмат ва спортда пешқадам” сарлавҳаси остида мақола берилган эди. Лавҳада унинг қўл жанги спорт турлари бўйича қўлга киритаётган юксак зафарларига кенг ўрин берилган, ғалабалари бирма-бир санаб ўтилганди. Ана шу ғалабаларининг давоми сифатида яна бир қувончли хабарни эътиборингизга етказмоқчимиз. Куни кеча Франция давлати шимолида жойлашган Лилль шаҳрида спортнинг Дзю-до тури бўйича ўтказилган Европа очиқ кубоги учун бўлиб ўтган муросасиз мусобақаларда қатнашган Фахриддин фахрли биринчи ўринни эгаллаб, жонажон Ватанимиз мадҳиясини Европа замини узра таралишига сабаб бўлди. Бу қувончли хушхабар унинг устозлари, ҳамкасбларини пойтахт ички ишлар бош бошқармаси ходимларини хурсанд қилиши, шубҳасиз. Ҳамкасбимизнинг хизмат ва спорт соҳасида эришаётган муваффақиятлари билан табриклаб, унга мустаҳкам соғлик, юртимиз шуҳратини дунёга таратишда улкан зафарлар тилаб қоламиз.