Podpolkovnik Zafar Shermuhamedov 24 yildan buyon ekspert-kriminalistika yo‘nalishida faoliyat yuritib keladi. Hozirda Yakkasaroy tumani IIOFMB EKB katta eksperti sifatida xizmat qilib kelmoqda.

Tergov-tezkor guruhi tarkibida voqea joyiga chiqqan har bir ekspert-kriminalistdan sinchkovlik va ziyraklik talab etiladi. Bu jihatlarni yaxshi o‘zlashtirgan, ustozlari­dan kasb sirlarini mukammal o‘rgangan lavhamiz qahramoni xizmat yillari davomida ko‘plab jinoyatlarning «issiq izida» ochilishida ishtirok etdi.

Xususan, joriy yilning o‘tgan davri mobaynida u tergov-tezkor guruhi tarkibida 30dan ortiq voqea joyini ko‘zdan kechirishda qatnashib, 64 ta ashyoviy dalil tadqiqotini o‘tkazdi.  Shuningdek, voqea joylaridan olingan izlar, daktokartalar, guvohlar, jabrlanuv­chilar va boshqalar so‘zidan tuzilgan fotorobotlar, shaxsi noma’lum murdalar, yashash joyi noaniq bo‘lgan shaxslar­ning fotosuratlarini o‘z vaqtida «ADIS-SONDA», «DOSYE» tizimlariga kiritib bormoqda. «Popillon» raqamli texnologiyasi dasturiy tizimiga 1180 ta qo‘l va kaft izlari tushirilgan daktokartalarni kiritgan. Qo‘l barmoq izlari orqali 3 ta va «Polifase» dasturiy tizimi orqali 2 ta jinoyatni ochishda qatnashgan.

Ekspert-kriminalist va tergovchining ishi bir-biriga chambarchas bog‘liq. Tuman IIOFMB huzuridagi Tergov bo‘limi tergovchisi, katta leytenant Erkin Ziyo­bekov faoliyati davomida bir necha bor podpolkovnik Zafar Shermuhamedov bilan hamkorlikda tergov-tezkor guruhi tarkibida voqea joyiga chiqqan. U yil boshidan bu­yon jami 18 ta jinoyat ishini yurituv­ga olgan bo‘lsa, shundan 7 tasini sudga oshirdi.

Ota hayotda farzandi uchun tog‘dek tayanch. O‘g‘lining tetapoya bo‘lishida va jamiyatda o‘z o‘rnini topishida yo‘lchi yulduzdir. Erkinning padari buzrukvori – Nurlan Bikbaum ichki ishlar organi xodimi sifatida o‘g‘liga ham ota, ham ustozlik qilgan. U IIV Malaka oshirish instituti kurs boshlig‘i. Qahramonimiz dastlabki yo‘l-yo‘riq va ko‘nikmalarni otasidan olgan bo‘lsa, keyin IIV Akademiyasida olgan ta’limi, qolaversa, ustozlari hamda hamkasblaridan o‘rgangan bilimlarini qo‘llab, tergov va surishtiruv ishlarini olib bormoqda. 

Tergov va ekspert-krimina­list tandemi ko‘pgina murakkab jinoyatlarni ochishda qo‘l keladi. Bu ikki xodimning hamkorlikdagi xizmati natijalari ham yomon bo‘layotgani yo‘q. Ular hudud tinchlik-osoyishtaligi uchun o‘z hissasini qo‘shishyapti.

Sarvar SOBIROV,

o‘z muxbirimiz.

Toshkent shahri. 

© POSTDA – На посту