Ilk talonchilik jinoyatini sodir etganida Bunyodjon 23 yoshda edi. O‘shanda adashganini, “shayton yo‘ldan urganini” aytib tavbasiga tayangan, ko‘z yoshlarini daryoday oqizib, sud hakamlarining muruvvatiga erishgan edi. 2 yilga axloq tuzatish ishlariga hukm qilingan Bunyodbek o‘zini sipo tutib, belgilangan tartibga rioya qilib yurdi. Bu orada o‘g‘lining quyilib qolishiga umid qilgan ota-onasi uni uylantirib qo‘ydi. Bir farzandning otasiga aylandi. Ko‘z yumguncha ikki yil ham o‘tib, namunali xulqi, to‘g‘ri yo‘lga kirganligi, xatosini tushunib yetganligi bois ro‘yxatdan chiqarildi. Ammo...

         2020-yilning yanvarida Bunyodjon Uchtepa tumanida joylashgan nonvoyxona atrofida o‘ralasha boshladi. Novvoy M.Quddusxo‘janing ishonchiga kirib, undan 10 kunlar ichida pulini olib kelib berish sharti bilan  qopi 225.000 so‘m bo‘lgan 3 qop unni olib qorasini ko‘rsatmay ketdi. Quddusxo‘ja 675.000 so‘mga kuyib qoldi. 2021-yilning mart oyida novvoy R.Xayriddinning ishonchiga kirib, qopi 260.000 so‘m bo‘lgan yigirma qop unni non yopib sotib, pulini keltirib berishiga ishontirib oldi-yu, boshqa qorasini ko‘rsatmadi.

         – Aslida non yopish qo‘lidan kelmaydigan Bunyodjon unlarni arzon garovga sotib yuboravergan, – deydi Uchtepa tumani IIO FMB huzuridagi Tergov bo‘limi tergovchisi, katta leytenant Bobur Sattarov. – Chunki, arzon kimga yoqmaydi. Aksariyat xaridorlar uning o‘g‘irlangan yoki o‘g‘irlanmaganligi, qay yo‘l bilan qo‘lga kiritilgani bilan qiziqishmaydi-da. Shu bois bundaylarning oshig‘i olchi.

          Jinoyat ishlari bo‘yicha Uchtepa tuman sudi ochiq sud majlisida, 1994-yilda tug‘ilgan I.Bunyodjonning qilmishini ko‘rib chiqib, uning aybiga iqrorligi, oilaning yagona boquvchisi ekanligi, zararni to‘liq qoplaganligini inobatga olib, O‘zbekiston Respublikasi Jinoyat kodeksining 168-moddasi (“Firibgarlik”) bilan aybli deb topib, ish haqining 20 foizini davlat daromadi hisobiga ushlab qolgan holda 2 yilga axloq tuzatish ishlariga hukm qildi.