Ichki ishlar vazirligi tizimlarida davom etayotgan “Yoshlar haftaligi-2024” doirasida respublikaning barcha hududlaridan tashrif buyurgan bir guruh yosh xodimlar Toshkent shahar IIBB faoliyati bilan yaqindan tanishdilar. Dastlab ular boshqarmaning Axborot multimediya markazi faoliyati, uning moddiy-texnik imkoniyatlari, jihozlanishi, aholi murojaatlariga tezkor munosabat bildirish, poytaxt aholisini ichki ishlar shaxsiy tarkibining jinoyatchilikka qarshi kurash, huquqbuzarliklarning oldini olish borasida amalga oshirilayotgan ishlari bilan tanishdi. Markaz tomonidan fuqarolarni ogohlikka chaqirish borasidagi ishlar, ish uslublari haqida maʼlumotlarga ega boʻlish barobarida, yosh xodimlar oʻzlarini qiziqtirgan savollarga batafsil javoblar olishdi. Soʻngra ular Bosh boshqarmaning Maʼnaviy-maʼrifiy ishlar va kadrlar bilan taʼminlash xizmatida boʻlib, u yerda tashkil etilgan “Vatanparvarlik burchagi” va xizmatlarga nomzodlarni qabul qilish tartibi borasida yaratilgan elektron dasturning ishlash tizimi tafsilotlaridan xabardor boʻlishdi. Shuningdek, Yagona tezkor boshqaruv markaziga tashrifi chogʻida markazning jinoyatchilikni “issiq izidan” fosh etish, huquqbuzarliklarni oldini olishning amaliy imkoniyatlari, ilgʻor texnologiyalardan samarali foydalanish uslublari, tezkorlikni taʼminlash jarayonlari bilan tanishdilar. Tashrif oxirida Boshqarma qoshida tashkil etilgan “Shon-sharaf” muzeyida boʻlishib, undagi ilk xizmatga oid buyumlar, vositalar, tarkibiy va hududiy boʻlinmalariga tegishli osori-atiqalarni qiziqib tomosha qilishgach, xizmat vazifasini bajarish chogʻida mardona halok boʻlganlar xotirasiga oʻrnatilgan xotira monumenti poyiga gullar qoʻyishib, oʻz hurmat va ehtiromlarini namoyish etdilar.

Yoshlar haftaligi doirasidagi tadbirlar davom etmoqda.