Tanlovida adashmadi
Kasbga ishtiyoq yoshlikdan boshlanadi. Avval havas bo‘lgan tuyg‘ular agar u mustahkam bo‘lsa, o‘zingiz bilan birga voyaga yetib, maqsadga aylanadi. Hilola Odil aka va Lolaxon opalarning uch farzandi ichida yakkayu yagona qiz bo‘lganligi bois, onasi uning vrach bo‘lishini istagan bo‘lsa, otasi esa uning har bir qaroriga xayrixoh edi. Maktabni a’lo baholarga tamomlagan Hilola Respublika IIV Akademiyasiga hujjatlarini topshirishini aytganida, onasi “bu erkaklarning kasbi, qiz bolaga do‘xtirlik yarashadi”, degan ammo otasi uning tanlovini qo‘llab-quvvatlagan edi. U tergov yo‘nalishini tanladi. Tinglovchilik davrini ortda qoldirib, ilk xizmat faoliyatini 2007-yilda Toshkent viloyati Bo‘stonliq tumani IIB Tergov bo‘limi tergovchisi, leytenant unvonida boshladi. Ustozi bo‘lim terovchisi, mayor Husniddin Umirboyev kamtar, o‘ta tortinchoq, jikkakkina, ko‘rinishidan ishonuvchan qizni ko‘rganida: “bundan tergovchi chiqmaydi, sal qattiq gapirsang yig‘lab yuboray deydi-ku, qo‘pol, surbet jinoyatchini qanday so‘roq qiladi”, degan fikrda, unga farzandlariga aliment to‘lashdan qochib yurganlar ishini topshirishni lozim topdi. Biroq Hilolaning farzandlari haqini to‘lamay, o‘zlarini har xil ko‘yga solib – ism-shariflarini o‘zgartirib, qo‘shni davlatlarga chiqib ketib, yashash joylarini yashirib – qochib yurganlarni topib ularni qonunan “tanoblarini tortib” qo‘yayotganini, bolalar haqlarini tiyin-tiyinigacha undirib berayotganini ko‘rgach, fikrini o‘zgartirdi. Tovlamachilik, bosqinchilik va boshqa og‘ir jinoyatlar bilan bog‘liq tergov ishlarini ishonib topshira boshladi. Xizmatga sidqidildan yondashuvi, tergov ishlarini qonundan og‘ishmay yuritishi, to‘g‘ri tasniflashi uning Toshkent shahar IIBB Mirzo Ulug‘bek tumani IIO FMB huzuridagi Tergov bo‘limida faoliyatini davom ettirishda qo‘l keldi. Bu yerda shahar va viloyat tumanlaridagi ichki ishlar organlari faoliyatidagi ayrim farqlar tezda ko‘zga tashlandi. Ish hajmining ko‘lami, jinoyat turlarining deyarli barchasining shaharda uchrashi, “shaharlashgan jinoyatchi”larning muomalasiga o‘rganish, ko‘nikish lozim edi. Ustozi mayor Shorasul Shonazarov yosh tergovchiga xizmatning o‘ziga xos jihatlarini o‘rgatish barobarida topshirilgan har bir jinoiy ishlarning shogirdi tomonidan yuritilishini qat’iy nazorat qilib, yo‘l qo‘ygan xato va kamchiliklarini ko‘rsatib bordi. Bugungi kunda poytaxt IIBB huzuridagi Tergov boshqarmasi Tergov bo‘limi katta tergovchisi, podpolkovnik Hilola Amanova haqida boshqarma rahbariyati uning intizomliligi, mehnatsevarligi, shaxsiy tarkibni o‘ziga ergashtira olishi, ishni xizmatga oid buyruq, ko‘rsatma va meyoriy hujjatlar talablari asosida tashkillashtirib, samarali olib borayotganini e’tirof etadi. Shuningdek, u o‘tkazilayotgan amaliy mashg‘ulotlar hamda shaxsiy tarkibni o‘qitish, tarbiyalash, kasb va jangovar mahoratlarini oshirish bilan bog‘liq chora-tadbirlarni unumli tashkillashtirib kelmoqda. Ko‘p yillik tajribasidan kelib chiqib, podpolkovnik H. Amanova insonning yaxshi-omon bo‘lishi oilaga, undagi tarbiyaga bog‘liqligini ta’kidlaydi. – Hayot faqat xursandchilik va huzur-halovatdan iborat emas. Uning o‘ziga yarasha sinovlari, achchiq va og‘ir mashaqqatlari bor, –deydi lavhamiz qahramoni. – Bunday holatlarda tushkunlik, umidsizlikka tushmaslik, egri yo‘llarni tanlamaslik uchun kasb-hunar egallamoq, bilimli bo‘lmoq, ko‘proq kitob o‘qimoq kerak. Ayniqsa, qiz-ayollar uchun hunar va odob-tarbiya juda zarur. Kuni kecha podpolkovnik H.Amanova O‘zbekiston Respublikasi Qurolli Kuchlari tashkil etilganining 33 yilligi hamda Vatan himoyachilari kuni munosabati bilan sidqidildan, fidoyi mehnatlari uchun Respublika IIV tomonidan II-darajali “Benuqson xizmatlari uchun” ko‘krak nishoni bilan taqdirlandi. Podpolkovnik H.Amanova turmush o‘rtog‘i ichki ishlar xodimi Abrorjon bilan bir qiz va ikki o‘g‘ilni bilimli, yurtimiz, xalqimiz koriga yaraydigan barkamol, sog‘lom fikrli insonlar bo‘lib yetishishi yo‘lida tarbiyalab kelishmoqda. Kun kelib, ular o‘z yutuqlari va yurtimizga munosib xizmatlari bilan ota-onasining yuzini yorug‘, kelajagini saodatli qilishi, shubhasiz.
