Yunusobod tumanida yoʻqolib qolgan qiz IIBB xodimlari tomonidan topildi

Kecha, 29-avgust kuni ijtimoiy tarmoqlarda 9 yoshli Robiya Eltoyevaning yoʻqolib qolganligi haqidagi xabar tarqalgan edi. Yunusobod tumanida yashovchi qiz uyidan taxminan soat 12:00 da axlat toʻkkani chiqib ketib, qaytib kelmagan. Oradan bir soat oʻtgach farzandining yoʻqligidan xavotirga tushgan ota-ona 102 raqamiga qoʻngʻiroq qilgan.

Toshkent shahar IIBB xodimlari tomonidan zudlik bilan tezkor-qidiruv tadbirlari amalga oshirildi. Oradan bir necha daqiqa oʻtgach Robiyaning qayerda ekanligi aniqlandi. Maʼlum boʻlishicha, Robiya uyga qaytayotganida doʻstlarini uchratib qoladi va ular bilan aylangani “Mega Planet” savdo-koʻngilochar markaziga boradi. Bu haqda ota-onasini ogohlantirib qoʻyish esa xayoliga ham kelmaydi.

Hurmatli ota-onalar! Farzandlaringiz xavfsizligi yoʻlida ular bilan muntazam ravishda tushuntirish ishlarini olib boring! Ularga kattalardan beruxsat biror-bir joyga borish mumkin emasligi haqida ogohlantiring!