Олимжоннинг ҳаёт танлови
Олимжоннинг асл орзуси Давлат йўл-ҳаракат хавфсизлиги хизматида ишлаш эди. Шу мақсадда Тошкент Автомобиль йўллари институтига ўқишга кирганди. Уни 2014 йилда муваффақиятли тамомлаган Олимжон Худайбергановнинг орзусига ҳаётнинг ўзи ўзгартириш киритди. У Яккасарой туманида жойлашган “Ҳамид Олимжон” маҳалласига профилактика инспектори этиб тайинланди. Ўша вақтлари маҳалла криминоген ҳолати оғир ҳудуд ҳисобланарди. Бунга сабаб, ҳудудда кўплаб қурилиш ишлари олиб борилар, бундан ташқари аксарият меҳмонхоналарнинг бу маҳалла ҳудудида жойлашиши эди. Ҳолбуки, қурилиш ишларида ёлланиб ишлаётганлар орасида, меҳмонхоналарнинг айрим мижозлари ўртасида ичкилик ҳамда ўзаро келишмовчиликлар оқибатида турли жиноят ва ҳуқуқбузарликлар содир этиларди. Гоҳо бу манзиллар қидирувда бўлган шахслар учун ҳам вақтинчалик бошпана вазифасини бажарарди. Профилактика ходимларининг туну кун ишлашларига тўғри келарди. Режали ва ҳамжиҳатликда олиб борилган ишлар натижасида маҳаллада эътироф этилар даражада тартиб ўрнатилгач, Олимжон тумандаги “Қушбеги”, икки йилдан сўнг эса “Муҳандис” маҳалласига профилактика инспекторлигига тайинланди. 2017 йилдан 2025 йилгача “Муҳандис” маҳалласида профилактика катта инспектори лавозимида фаолият юритган Олимжон Худайберганов “қизил” тоифадаги ҳудудни "сариқ” тоифага ўтказишга муваффақ бўлди. Бунда маҳалла фуқаролар йиғини раиси Акмал Султонов, маҳалла фаоллари, “еттилиги”, уйбоши ҳамда кўчабошиларнинг ҳам биргаликдаги салмоқли ҳиссаларини қайд этиш лозим, албатта. Қурилиш олиб борилаётган манзиллар, корхона-ташкилотлар маъмурияти, мутасаддилари, қурувчи ва ишчилар билан ўтказилган профилактик суҳбатлар, тушунтириш, огоҳлантириш ишларининг тизимли олиб борилиши натижасиз кетмади. Шуни ҳам эътироф этмоқ лозимки, у мазкур маҳаллада иш бошлаганида аҳоли сони уч мингга яқинни ташкил этган бўлса, навбатдаги янги лавозимга ўтиш даврида аҳоли сони тўққиз мингдан ошганди. Олимжон Худайбергановнинг меҳнатлари, ишониб топширилган ҳудудларда тинчлик-осойишталик, жамоат тартибини сақлаш, маҳалла фуқаролари бирлигини таъминлашдаги саъй-ҳаракатлари раҳбарият томонидан муносиб баҳоланиб, шаҳар, туман ҳокимлиги, ИИББ, ИИО ФМБ томонидан ташаккурнома, фахрий ёрлиқлар билан эътироф этилган. Ёшлар ўртасида жиноятчиликка барҳам бериш, ҳуқуқбузарликларнинг олдини олиш борасида олиб борган ишлари учун Ўзбекистон республикаси Вазирлар Маҳкамасининг “Ёшларни ватанпарварлик руҳида тарбиялаш учун” медали билан тақдирлангани ҳам унинг сидқидилдан хизматларига берилган баҳодир. Бугунги кунда Яккасарой тумани ИИО ФМБ Маъмурий амалиёт гуруҳи катта инспектори лавозимида фаолият юритаётган майор Олимжон Худайберганов туман маҳаллаларида профилактика инспекторлари фаолиятини мувофиқлаштириш, хизмат вазифаларини белгилаш ҳамда назорат қилиш ишларини самарали олиб бормоқда. Янги 2026 йилнинг “Маҳаллани ривожлантириш ва жамиятни юксалтириш йили” деб эълон қилингани маҳаллаларда тинчлик ва осудаликни таъминлаш, жамоат тартибини сақлаш, жиноятчилик ва ҳуқуқбузарликларнинг олдини олиш, ҳудуд ободлиги, фуқаролар хавфсизлиги йўлида амалга оширилаётган ишларга ўзгача суръат ва янгича ёндашувни талаб қилиши тайин. Бу вазифалар пойтахт ИИББ Ҳуқуқбузарликлар профилактикаси бошқармаси, хусусан, Яккасарой тумани ИИО ФМБ ходимлари томонидан самарали амалга оширилишига шубҳа йўқ.
