Номзодларни тўғри танлаш самарали фаолиятга илк қадам
Ҳар бир соҳада иш самарасини белгиловчи куч бу – кадрлардир. Уларни тўғри танлаш, жой-жойига қўйиш, билими ва малакасини тўғри йўналтириш, имконияти ва шижоатидан унумли фойдаланиш масъулларнинг малакаси, тажрибаси ва уқувига боғлиқ. Мана кўп йиллардирки, подполковник Акмал Адилов ана шу фаолиятни юритиб келмоқда. Асли институтни тугатиб 2004 йилда Сирдарё вилояти ИИБ 13-тергов ҳибсхонаси бошлиғининг навбатчи ёрдамчиси лавозимида хизматни бошлаган Акмал бир йил ўтар-ўтмас вилоят бошқармаси шахсий таркиб билан ишлаш хизмати инспектори лавозимига ўтказилди. Зотан ўша пайтдаги устози: капитан Раҳматилла Холов ёш, шижоатли, зийрак, интилувчан, “оёғидан ўт чақнаб” турган бу йигитни кўрганидаёқ унинг салоҳиятига баҳо бериб бўлганди. Суҳбатларнинг бирида раҳбари капитаннинг шогирди ҳақида сўраганида у: “бу йигит адашиб келиб қолмаган, унинг салоҳияти катта ва масъул ишларга қодир, мана кўрасиз”, деган эди. Ишлаганига уч ой бўлмай устози ёрдамчисига йиллик иш режасини тузиш топшириғини берди. Раҳбар режага имзо қўйишда у билан танишиб чиқиб “буни ким тузди”, деб сўради. Р.Холов “мен сизга айтган йигит”, деб жавоб берди. Эртаси куниёқ раҳбарият буйруғи билан Акмал вилоят ИИБ шахсий таркиб билан ишлаш хизматига ўтказилди. Шу-шу Акмалнинг фаолияти ички ишлар органларига муносиб кадрлар тайёрлаш соҳаси бўйича кетди. Соҳанинг етук мутахассиси, ўз ишининг “устаси” бўлишга интилган Акмал устозлари: катта лейтенант Ғофур Қўшоқов, полковниклар Раҳматилла Эралиев, Алишер Усмонов, Эргаш Абдуқодировларни самимий ва илиқ сўзлар билан ёдга олади. “Менга бирор яхши нарсани ўргатган ҳар бир инсон мен учун устоз”, дейди у. Унинг ўз вазифасига ижобий ёндашуви, тизимга муносиб номзодларни қабул қилишдаги жонкуярлиги ва виждонан, ҳалол муносабати ўз самарасини берди. 2017 йилда у Республика ИИВ Шахсий таркиб билан ишлаш хизматида фаолиятини давом эттирди. Табиатан янгиликка интилувчан, серҳаракат, ҳар бир ишга илмий ёндашишга мойил бўлган Акмал ИИВ қошида Академик лицей тузиш ғоясини ҳам илгари суриб, низомини ишлаб чиқишда фаол қатнашганлардандир. Отаси Мирзааҳмад ака - оддий ҳайдовчи, онаси Муҳтарам опа - мактаб ўқитувчиси бўлган, айни дамда иккиси ҳам нафақада қарилик гаштини сураётган бу оилада ҳамиша тинчлик-тотувлик, билимга қизиқиш, болаликдан китобга ошно қилишга катта эътибор берилган. Бугунги кунда подполковник Акмал Адилов пойтахт ИИББ Маънавий-маърифий ишлар ва кадрлар билан таъминлаш хизмати бошлиғи ўринбосари маънавий-маърифий ишлар бўлими бошлиғи лавозимида сидқидилдан меҳнат қилиб келмоқда. Ўз табиатидан келиб чиқиб, ички ишлар органларига кириб ишлаш иштиёқида бўлган номзодларни қабул қилишда сансалорлик, сунъий тўсиқлар яратиш, ортиқча қоғозбозликнинг олдини олиш мақсадида “Е-номзод” дастурини ишлаб чиқиш таклифи ҳам қаҳрамонимиз томонидан берилди. Ушбу дастур амалиётга киритилгач, ойлаб тайёрланадиган ҳужжатлар, номзодни ўрганиш жараёни бир неча дақиқа ичида амалга оширилиб келинмоқда. Мазкур дастур номзодларни ўрганиш баробарида ички ишлар органларида кадрлар заҳирасини яратиш имконини ҳам бермоқда. Унинг хизматлари раҳбарият томонидан муносиб эътироф этиб келинмоқда. ИИВнинг “Аъло хизматлари учун”, “Мустақилликнинг 30 йиллиги” кўкрак нишонлари ҳамда кўплаб ташаккурнома ва фахрий ёрлиқлар билан мукофотлангани унинг хизматларига берилган муносиб баҳодир. Бугунги кунда лавҳамиз қаҳрамони турмуш ўртоғи Сабоҳатхон билан биргаликда 4 нафар фарзандни тарбиялаб келишмоқда. Қизларининг тўнғичи Дилобар Миллий гвардия Жамоат хавфсизлиги университетининг курсанти, ўғли Давронбек Республика ИИВ ихтисослашган мактаб-интернати ўқувчиси, икки нафарининг эса касб танлашига ҳали вақти бор. Бу оилада ҳукм сураётган илм олишга иштиёқ, ҳар бир ишга ижобий ёндашиш яқин келажакда ўз самарасини бериши шубҳасиз.
