Зиқналикми ёки тежамкорлик?!
Шундай одамлар борки, бир сўм сарфласа, кечаси билан уйқуси келмай тўлғаниб чиқади. Қандай қилиб бўлса-да уни икки баравар қилиб қайтариш ҳақида ўйлайди. Исмоил шундайлардан бўлиб чиқди. У бекорчиликдан таниши Кенжабойни шаҳар айланишга чақирди. Кенжабой айлангани пули йўқлигини айтганида, “хавотир олма, менда бор, кейин берарсан”, деди. Сайр чоғида бирга тамадди қилишди, минерал сув олиб берди яна майда-чуйда дегандек. Ҳа айтгандек, такси пулини ҳам тўлади. Кечга яқин хайрлашишди. Исмоил бир кун кутди, икки кун кутди. Кенжабойдан дарак бўлмади. Орадан бир ҳафта ўтиб, яъни 2021 йилнинг 7 январ куни соат 19.00 ларда уни учратиб қолди ва овқатланиш пулини Кенжабойга тўлаттириш ниятида уни қаҳвахонага таклиф қилди. Бироқ у яна ёнида пули йўқлигини айтганида, Исмоилнинг тепа сочи тикка бўлди. Бироқ миясига яшин тезлигида келган фикрдан ўзини босиб, ундан зарур қўнғироқ қилиши кераклигини айтиб, телефонини сўради. Баҳоси 5.500.000 сўмлик “Samsung А 52” русумли телефонни олиб гаплашаётган бўлиб, Кенжабойнинг чалғиганидан фойдаланиб, воқеа жойидан яширинди. Бирон соат ўтмай, уни 1.850.000 сўмга сотиб юборди. 14 январда эса Дўмбиробод кўчасидаги уйлардан бирида ижарада бирга яшовчи Жамолиддиннинг 2.050.000 сўмлик “Redmi Note 8” русумли уяли телефонини қўнғироқ қилиш учун сўраб олиб, қайтариб бермади. Унинг телефонини 700.000 сўмга сотиб юборди. Ҳамхонасининг айби эса пули йўқлиги учун ўтган ой ижара пулини тўлай олмай, Исмоилдан қарз олгани эди. – Тергов жараёнида Исмоил ўзини айбдор деб билмади. Алдов йўли билан олинган телефонларни уларга сарфлаган пуллари эвазига товон пули деб ҳисоблади, – дейди Чилонзор тумани ИИО ФМБ ҳузуридаги Тергов бўлими терговчиси, майор Рустам Жепбиев. – Ҳар бир ҳаракатини пулга чақадиган бу шахсда бировга яхшилик қилиш, ўзаро ёрдам, беминнат, беғараз қўллаб-қувватлаш деган тушунчалар умуман бегона эканлиги кишини ҳайрон қолдиради. Жиноят ишлари бўйича Чилонзор туман суди очиқ суд мажлисида Жаҳонгирнинг қилмишини кўриб чиқиб, уни Ўзбекистон Республикаси Жиноят кодексининг 168-моддаси 3-қисми “б” банди (“Фирибгарлик”) билан айбли деб топди. Суд унинг айбига иқрорлиги, етказилган моддий зарарни тўлиқ қоплаганлиги, жиноятнинг хусусияти, ижтимоий хавфлилик даражасини инобатга олди. Уни жамиятдан ажратмаган ҳолда қайта тарбиялаш мумкин, деган хулосага келиб, иш ҳақининг 10 фоизини давлат даромади ҳисобига ушлаб қолиш шарти билан 1 йилга ахлоқ тузатиш ишларига ҳукм қилди.
