Шиддат билан ривожланаётган ҳаётимизда рўй бераётган юксалиш жараёнлари ўзини барча соҳаларда намоён этмоқда. Мустақилликнинг илк йиллариданоқ юртимизда миллий ўзлигимизни англаш, бой тарихий, маданий, илмий меросимизнинг асл мазмун-моҳиятини чуқур англаш, “Миллий тикланишдан – миллий юксалиш” ғоясини амалга оширишга киришилди. Бугунги Маънавият ва маърифат дарси “Янги Ўзбекистон – учинчи Ренессанс йўлида” номи билан айнан шу мавзуга бағишланди. Янги аср университети академик бўлим бошлиғи, тарих фанлари бўйича фалсафа доктори, доцент Азизбек Мўминов пойтахт ИИББ мажлислар залига йиғилган шахсий таркиб олдидаги маърузасини юртимизнинг қадим тарихи, минтақамизда юз берган Биринчи шарқ уйғониш давридан буён давом этаётган жараёнларга тўхталаркан, ҳар икки Уйғониш даврида энг муҳим жиҳат –давлатнинг эътибори, мамлакат бошқарувида олиб борилган одилона ва оқилона сиёсат, таълим-тарбия масалалари устувор бўлганлигини таъкидлаб ўтди. Шунингдек, юртимизда бошланган бунёдкорлик, янгиланишга қаратилган жараёнлар изчил давом эттирилиб, халқмиз орзу қилган буюк давлат, фаровон келажак барпо этиш йўлидаги саъй-ҳаракатларимиз албатта ўз самарасини кўрсатишига ишонч билдирилди. Маърузада кўплаб тарихий маълумотларнинг келтирилиши йиғилганларда катта қизиқиш уйғотди.

Тадбир “Таҳлилнома” ахборот дастури намойиши билан якунланди.