Пайшанба тадбирлари ойлик тадбирлари уйғунлигида
Ҳафтанинг ҳар пайшанба куни пойтахтимиз ҳудудида кенг қамровли профилактик тадбирларнинг ўтказиб келинаётганлиги жиноятчиликка қарши кураш, ҳуқуқбузарликларнинг олдини олишда ўз натижакорлигини кўрсатмоқда. Навбатдаги “Профилактика куни” да Тошкент шаҳар ИИББ ҳудудий тузилмаларидаги йиғилиш анъанага кўра тонгги йўриқнома билан бошланиб, тадбирга жалб этилган ИИО ФМБ, ҳуқуқни муҳофаза қилиш идоралари ҳамда бошқа мутасадди идоралар, хусусан, экология ва атроф муҳитни муҳофаза қилиш туман бўлимлари ҳамда қурилиш соҳасида масъул ташкилотлар вакилларининг иштирокида ўтди. Ҳолбуки, жорий йилнинг 24 ноябрь куни Президентимиз томонидан “Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги Фармонининг ижросини таъминлаш мақсадида ташкил этилган махсус ишчи гуруҳлар таркибидаги бу соҳа вакиллари томонидан ҳамкорликда пойтахт ҳавосини мўътадиллаштириш, атмосферани ифлослантираётган айрим корхона ва ташкилотлар, иссиқхоналар фаолиятига чек қўйиш каби муҳим вазифалар амалга оширилмоқда. Мазкур қарорнинг ижросини таъминлаш мақсадида, мутасаддилар пойтахтимиз ҳудудида олиб борилаётган қурилиш объектларида бўлишиб, ҳавога чанг-тўзон кўтарилиши, атроф-муҳитга салбий таъсир кўрсатувчи омиллардан фойдаланмаслик, атмосфера ҳавоси тозалигини сақлаш юзасидан зарурий тавсиялар бердилар.
Туманларда пробация ҳисобида ҳамда профилактик ҳисобда турувчи шахслар иштирокида очиқ мулоқот тарзидаги учрашувлар ўтказилиб, уларнинг муаммолари ўрганилди. Шунингдек, улар томонидан такроран жиноят ва ҳуқуқбузарликларга йўл қўймаслик ҳамда олдини олиш масалаларига эътибор қаратилди. Жойларда ташкил этилган сайёр судлар томонидан Пробация бўлими ходимларининг тақдимномаларига асосан, тўғри йўлга кирган, намунали хулқи ва тузалиш йўлини танлаган маҳкумларни муддатидан илгари жазодан озод қилиш чоралари кўрилди.
Белгиланган тартиб-қоидаларни бузган маҳкумларга эса судлар томонидан жазо турлари оғирроғига ўзгартирилди. Бу долзарб тадбирлар қаторида Президентимиз томонидан қабул қилинган “Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича комплекс чора-тадбирлар тўғрисида”ги Фармонининг мазмун-моҳиятини кенг аҳоли қатламлари, идора ва ташкилотлар, ўқув муассасаларида ўрганиш ва тарғиб қилиш ишлари давом эттирилди. Шунингдек, “Хавфсиз ва соғлом юрт”, “Кибермаданиятни юксалтириш” ойликлари доирасида белгиланган чора-тадбирлар ижросини самарали амалга ошириш мақсадида қатор топшириқ ва кўрсатмалар таъкидлаб ўтилди. Мазкур ойликлар доирасида туманларда ИИО ФМБ раҳбарлари томонидан маҳалла масъуллари иштирокида низоли оилалар ҳолидан хабар олинди, фойдали меҳнат билан банд бўлмаган ёшларнинг муаммолари ўрганилди ва ҳал этиш чоралари кўрилди. Шунингдек, жойларда содир этилган оилавий зўравонлик, кибержиноятлар, қонунбузилиш ҳолатлари жамоатчилик вакиллари, “маҳалла еттилиги” ва фаоллари иштирокида муҳокама этилди. Пойтахт ҳудудидаги таълим муассасаларида ўтказилган тарғиботларда ёшлар иштирокида содир этилаётган ҳуқуқбузарликлар, кибержиноятлар, ўғирлик, автоуловларни олиб қочиш жиноятларининг олдини олиш, ижтимоий тармоқлар орқали тарқалиб бораётган киберфирибгарлик, зўравонлик, диний-экстремистик ғоялар тарғиботи ва гиёҳвандлик воситалари, психотроп ва кучли таъсир қилувчи моддаларнинг ноқонуний айланмаси билан боғлиқ жиноятлар ва улардан ҳимояланиш йўллари, жиноят учун жавобгарликнинг муқаррарлиги каби мавзулар атрофлича ёритилди.
Шу билан бирга ёшларнинг ҳуқуқий маданияти, саводхонлигини ошириш бўйича уюшмаган ёшлар, хотин-қизлар билан манзилли суҳбатлар уюштирилди. Очиқ мулоқот тарзида ўтказилаётган учрашувларда йиғилганларга қабул қилинаётган меъёрий ҳужжатларнинг, профилактик тадбирларнинг аҳамияти, маҳаллаларда, пойтахтимизда хавфсиз муҳитни яратиш, жиноятчилик ва ҳуқуқбузарликларнинг олдини олишдаги муҳим ўрни таъкидланмоқда.
