ТОШКЕНТ ШАҲАР ИЧКИ ИШЛАР БОШ БОШҚАРМАСИ

Биз ҳақимизда Боғланиш

Мирзо Улуғбек туманида содир бўлган ЙТҲ ҳақида маълумот

2024 йилнинг 7 ноябрь куни соат тахминан 13:00 ларда Мирзо Улуғбек тумани, Янги Ўзбекистон кўчасида жойлашган автотураргоҳларнинг бирида, ҳайдовчи вояга етмаган 2008 йилда туғилган С.П. “Mercedes Benz” русумли, давлат рақам белгиси 01 Q 555 BB бўлган автомашинада ҳаракатланиб, 2 нафар пиёдани (2003 йилда туғилган Ж.С. ва 2006 йилда туғилган Ш.Э.) уриб юборган. Натижада жабрланувчилар шифохонага олиб борилган. Судга оид тиббий экспертизанинг хулосасига кўра, фуқаро Ш.Э. нинг ҳолати оғирлик даражаси бўйича енгил тан жароҳати, фуқаро Ж.С. эса “оғир” тан жароҳати деб баҳоланган. Мазкур ҳолат юзасидан Ўзбекистон Республикаси Жиноят кодексининг 266-моддаси 1-қисми (“Транспорт воситалари ҳаракати ёки улардан фойдаланиш хавфсизлиги қоидаларини бузиш”) билан жиноят иши қўзғатилган. Ҳозирда дастлабки тергов ҳаракатлари тамомланиб, тегишли тартибда судга юбориш чораси кўрилмоқда.

11 Март 2025 йил

462

Маҳаллалар тинчлигини кўзлаб

Пойтахт туманлари ички ишлар органлари тизимларида Президентимизнинг маҳаллаларда хавфсиз муҳитни яратиш ва ҳуқуқбузарликларни барвақт олдини олиш бўйича қабул қилган қарори ижросини таъминлаш борасидаги ишлар жадал олиб борилмоқда. Яшнобод тумани ИИО ФМБ бошлиғига бириктирилган “Баркамол” маҳалла ҳудудида қарор талабларидан келиб чиққан ҳолда Бошқарув сервис компанияси мутасаддилари иштирокида қўшимча равишда видеокузатув камералари ўрнатиш масалалари ўрганиб чиқилди. Ўрганишлар натижасида аниқланган низоли, ичкиликка ружу қўйган, нотинч ҳисобланган 6 та оила хонадонларига “Қўриқлаш” хизмати томонидан “ташвиш тугмалари” ўрнатилди. Шунингдек, қарор ижроси давомида туман ишчи гуруҳи томонидан ҳудудда жойлашган “Авиасозлар” маҳалла фуқаролар йиғинида жойлашган кўп қаватли уйлар ўрганилди. “Авиасозлар-3” даҳасида жойлашган 16-а уйнинг кириш йўлакларига “ташвиш тугмалари”, ён-атрофига кузатув камералари ва кириш эшикларига “домофон” ўрнатилди. Бу каби ишлар туманнинг бошқа маҳаллаларида ҳам давом эттирилмоқда.

11 Март 2025 йил

136

Футбол бўйича “Ички ишлар вазири кубоги” давом этмоқда

Ички ишлар вазирлиги таркибий тузилмалари ўртасида спортнинг футбол тури бўйича “Ички ишлар вазири кубоги” мусобақасининг учинчи (чорак, ярим ва финал баҳслари) босқичига старт берилди. Тошкент шаҳар ИИББ ўрин олган “Б-гуруҳи” дан ИИВ Қоровул қўшинлари қўмондонлиги, Қорақалпоғистон Республикаси ИИВ ҳамда Жиззах вилояти ИИБ терма жамоалари ўзаро майдонда куч синашиши маълум бўлди. Тошкент шаҳар Ички ИИББ терма жамоаси 9 март куни Жиззах вилояти ИИБ терма жамоасига қарши майдонга тушди ва 0:0 ҳисоби қайд этилган бўлса, 10 март куни вакилларимиз Қорақалпоғистон Республикаси ИИВ терма жамоасига қарши баҳс олиб борди ҳамда 1:0 ҳисобида ғалаба қозонди. Терма жамоамиз вакиллари 11 март куни ИИВ Қоровул қўшинлари қўмондонлиги терма жамоасига қарши майдонга тушади. Вакилларимизга Тошкент шаҳар ИИББнинг шахсий таркиби номидан мувафақият тилаймиз.

10 Март 2025 йил

207

Талончилик жинояти муҳокама этилди

Маҳаллаларда тинчлик ва осойишталикни сақлашга нафақат ҳуқуқни муҳофаза қилувчи орган ходимлари, балки маҳалла фаоллари ҳам масъул эканликларини унутмаслик лозим. Маҳаллада содир этилаётган жиноят ва ҳуқуқбузарликларни сабабларини аниқлаш ва уларни келгусида такрорланишига йўл қўймаслик мақсадида содир этилган жиноятлар фуқаролар иштирокида муҳокама этиб келинмоқда. Куни кеча Сергели тумани “Бирдамлик” маҳалласида содир этилган жиноят муҳокама қилинди. Қайд этилишича, жорий йилнинг 7 март куни фуқаро 1989 йилда туғилган А.Бобур Сергели тумани ИИО ФМБга ариза билан мурожат қилди. Шу куни тунги соат 22.20 ларга яқин таниши 1987 йилда туғилган Б.Олмос билан жанжаллашиб қолганини, жанжалга унинг таниши 2005 йилда туғилган А.Абдумўмин ҳам аралашгани, оқибатда икковлон Бобурга тегишли нархи 2.500.000 сўмлик “Samsung S 21” телефонини тортиб олиб қочиб кетганлиги аниқланди. Олиб борилган тезкор ҳаракатлар натижасида талончилар зудлик билан қўлга олиниб, терговга жалб қилинди. Ҳолат юзасидан Сергели тумани ИИО ФМБ Тергов бўлми томонидан Ўзбекистон Республикаси Жиноят кодексининг 166-моддаси билан жиноят иши қўзғатилиб, гумон қилинувчилар процессуал тартибда ушланди. Жиноят муҳокамасида Тошкент шаҳар ИИББ ва туман ИИО ФМБ раҳбарияти, маҳалла еттилиги, фуқаролари, фаоллари ҳамда бошқа мутасаддилари иштирок этди. Сўзга чиққанлар мазкур жиноий ҳолатга танқидий баҳо беришди. Шу билан бирга ҳудудда бу каби салбий ҳолатларга йўл қўймаслик, жиноятлар ва ҳуқуқбузарликларнинг барвақт олдини олишга қаратилган шу йилнинг январь ойида Президентимиз томонидан қабул қилинган қарорга тўхталдилар. Қарорнинг ижросини таъминлашга бўйича манзилли чора-тадбирлар ишлаб чиқиш, ҳар бир бандининг ижросига масъул шахсларни белгилаш бўйича ўз таклифлари, фикр-мулоҳазаларини билдиришди. Маҳалла еттилиги томонидан амалга оширилиши лозим бўлган ишлар белгилаб олинди.

10 Март 2025 йил

161