Пайшанба тадбирлари кундалигидан
Бугунги Янги – 2026 йилни кутиб олиш арафасида ўтказилган “Пайшанба – профилактика куни” тадбирига бағишланган тонгги йўриқнома қатнашчилари олдига кўплаб муҳим вазифалар қўйилди. Асосий эътибор яқинлашиб келаётган Янги йил байрам тадбирларини аҳоли ҳамда пойтахт меҳмонлари томонидан кўтаринки руҳда ўтказиш, жамоат тартибини таъминлаш, ҳуқуқбузарликларнинг олдини олиш, фавқулодда вазиятлар юзага келганида уларни тезкор ва самарали бартараф этиш, куч ва воситаларни арча байрамлари ўтказиладиган майдонлар, сайлгоҳлар, маданият ва истироҳат масканларига тўғри тақсимлаш кабиларга қаратилди. Шунингдек, тантаналар арафасида пиротехника воситаларининг ноқонуний муомаласига чек қўйиш, барвақт аниқлаб олдини олиш борасидаги ишларга диққатни қаратиш таъкидланди. Ходимлар янги йил шодиёналари: кўнгилочар томошалар, концерт, ярмаркалар ўтказиладиган манзилларда ҳушёрликни ошириш, фуқаролар билан хушмуомала бўлишга чақирилди. Амалга ошириладиган ишлар сирасига Президентимиз томонидан қабул қилинган аҳоли саломатлиги ва миллат генофондини гиёҳвандлик иллатларидан асраш, пойтахт ҳудудида экологик вазиятни яхшилаш, Пробация ҳамда профилактика хизмати рўйхатларида турувчи шахслар билан суҳбатлар ўтказилиб, улар томонидан қайта жиноят содир этилишининг олдини олиш, жамиятга мослашуви, бандлигини таъминлаш каби муҳим масалаларга ҳам урғу берилди.
Аксарият туманларда байрам арафасида ташкил этилган сайёр судлар томонидан Пробация бўлими ходимларининг тақдимномаларига асосан, тузалиш йўлига кирган, намунали хулқи ва ҳалол, соғлом турмуш тарзини танлаган маҳкумларни муддатидан илгари жазодан озод қилиш чоралари кўрилди. Ўқув юртлари ўқувчиларининг қишки таътили олдидан гиёҳвандлик воситалари, психотроп ҳамда кучли таъсир қилувчи моддаларнинг ноқонуний айланмаси, тарқатилиши, истеъмолига қарши кураш, айниқса ёшларимизни бу иллатдан асраш борасида қатор тарғибот, тушунтириш ва огоҳлантириш ишлари, айниқса, янги йил олдидан кибермаконда болаларга бепул бонуслар ва ўйинлар валютаси ваъда қилиниши оқибатида ғараз кимсаларнинг жиноий тузоғига тушиб қолмасликлари учун ота-оналарга болалар билан интернет хавфсизлиги қоидаларига амал қилиш тавсия этилди. Шунингдек, мактаб ўқувчиларининг таътилда йўлларда ҳаракатланиш қоидаларига, байрам тадбирларида эҳтиёткор ҳаракат қилишлари, катталар томонидан назоратни сусайтирмаслик, белгиланган тартиб-қоидаларга амал қилишларига даъват этилди. Маҳаллалар, корхона-ташкилотларда тизимли равишда уюштирилаётган суҳбатлар, очиқ мулоқотларда кибермаконда жиноятга етакловчи ҳавола ва платформалардан ҳимояланишга катта эътибор қаратилмоқда. Хусусан, туманлар ИИО ФМБ раҳбарлари томонидан маҳалла масъуллари иштирокида низоли оилалардаги муносабатлар, фойдали меҳнат билан банд бўлмаган ёшларнинг муаммолари ўрганилди ва ҳал этиш чоралари кўрилди. Жойларда содир этилган оилавий зўравонлик, кибержиноятлар, қонунбузилиш ҳолатлари жамоатчилик вакиллари, “маҳалла еттилиги” ва фаоллари иштирокида муҳокама этилиб, таъсирчан чоралар кўрилди. Пойтахт ҳудудидаги таълим муассасаларида ўтказилган тарғиботларда асосий эътибор ёшларнинг ҳуқуқий маданияти, саводхонлигини ошириш, йиғилганларга қабул қилинаётган меъёрий ҳужжатларнинг, профилактик тадбирларнинг аҳамияти, маҳаллаларда, пойтахтимизда хавфсиз муҳитни яратиш, жиноятчилик ва ҳуқуқбузарликларнинг олдини олишдаги муҳим ўрни таъкидланмоқда ҳамда фаол иштирок этишга чақирилмоқда.
