Ижтимоий тармоқларда ИИО ходимлари ва фуқаролар ўртасида можаро акс этган видео тарқалиб турли муҳокамаларга сабаб бўлмоқда. Ҳолат юзасидан қуйидагиларни маълум қиламиз.

Жорий йилнинг 16 август куни тахминан соат 21.40 ларда Олмазор тумани Қора қамиш 1/3 даҳасида тунги хизматга жалб қилинган профилактика инспектори Ш.Қурбонов ва патруль-пост хизмати инспектори А.Мамадалиевлар хизмат олиб бораётган вақтида шубҳали шахсларни кўришган. Уч нафар фуқаро йўл четида тўхтаб турган Малибу русумли автомашина ойнасининг қорайтирилган плёнкасини шилаётган бўлганлиги сабабли ИИО ходимлари улардан автомашинанинг эгаси кимлигини суриштириб, ҳужжатларни тақдим этишни сўрашган. Бироқ 2005 йилда туғилган У.М. ички ишлар органлари ходимларининг қонуний талабларини бажармасдан, автомашина эшигини қулфлаб, ҳеч қандай ҳужжатларни тақдим этмай, уларга фаол қаршилик кўрсатиб, воқеа жойидан қочишга ҳаракат қилган. ИИО ходимлари томонидан У.М. қўлга олингандан сўнг автомашинанинг салон қисмига ўтқизилган ва туман ИИО ФМБга олиб борилган.

Текширув жараёнида автомашина У.М. нинг акаси Р.М.га тегишли эканлиги аниқланган.

Мазкур ҳолат юзасидан Олмазор тумани ИИО ФМБ томонидан У.М.га нисбатан Ўзбекистон Республикаси Маъмурий жавобгарлик тўғрисидаги кодексининг 194-модда (“Ички ишлар органлари ходимининг қонуний талабларини бажармаслик”) ва 195-моддаси (“Ички ишлар органлари ходимларининг ўз хизмат бурчларини бажаришларига қаршилик кўрсатиш”) аломатлари билан маъмурий баённома расмийлаштирилган. Тўпланган ҳужжатлар қонуний чора кўриш учун Жиноят ишлари бўйича туман судига юборилган.