IIBB yangiliklari:
Haydovchilar avtomobil kalitini o't oldirgichda qoldirmang!
11 Avgust 2021 Yil 4122

Yangihayot tumanidagi poliz ekinlari sotuvchisi bilan bogʻliq holat toʻgʻrisida

Internet tarmogʻida tarvuz va qovun sotuvchisining qoʻlga olinishi tushirilgan “Navbat bechora dehqonlarga keldimi deyman” sarlavhali video tarqamoqda. Mazkur fakt boʻyicha quyidagilarni ma’lum qilamiz.

2021 yil 5 avgust kuni soat 18:10 da Yangihayot tumani Tursunzoda koʻchasidagi yoʻl chetida Shaxzod G. poliz ekinlarini sotish maqsadida terib qoʻyib, bu bilan jamoat tartibini buzgan.

Qayd etish joizki, ichki ishlar organlariga har yili iyul va avgust oylarida yoʻl harakati qatnashchilari nomidan yoʻllarda noqulaylik va xavf tugʻdirayotgan tarvuz va qovun sotuvchilariga nisbatan noroziliklar kelib tushadi.

Toshkent shahar IIBB xodimlari ushbu murojaatlarni inobatga olmoqdalar. Tekshiruv maqsadida xodimlar Shaxzod G.dan shaxsini tasdiqlovchi hujjatlarini va savdo qilish huquqini beruvchi ruxsatnomani taqdim etishini soʻrashdi. Ammo fuqaro ichki ishlar organlari xodimlarining qonuniy talablarini mensimasdan, ularni uyatli gaplar bilan haqorat qilishni boshlagan va sodir etgan huquqbuzarligi uchun javobgarlikdan qutulib qolish niyatida atrofdagilarning e’tiborini tortmoqchi boʻlgan.

Natijada fuqaroga nisbatan Oʻzbekiston Respublikasi Ma’muriy javobgarlik toʻgʻrisidagi kodeksining 183-moddasi (“Mayda bezorilik”) va 194 moddasi (“Ichki ishlar organlari xodimining qonuniy talablarini bajarmaslik”) boʻyicha bayonnoma rasmiylashtirildi. Hujjatlar qonuniy chora koʻrilishi uchun sudga topshirildi.

Sudning qaroriga koʻra, fuqaroning hatti-hatakatlariga Toshkent shahar IIBB xodimlari tomonidan toʻgʻri baho berilgan va fuqaro aybiga iqror boʻlib tavba qilgani bois unga nisbatan Oʻzbekiston Respublikasi Ma’muriy javobgarlik toʻgʻrisidagi kodeksining 34-moddasiga (“Bir necha huquqbuzarliklarni sodir etganlik uchun ma’muriy jazo qo’llanish”) muvofiq besh kunlik qamoq koʻrinishidagi jazo belgilandi.

Belgilangan matnni tinglash uchun quyidagi tugmani bosing Powered by GSpeech